Amerikaning eng yirik OAVlari tomonidan AQShning saylangan prezidenti deya e’tirof etilayotgan Jo Bayden iti bilan yugurib o‘ynayotib, toyib ketdi va oyog‘ini qayirib oldi. Bu haqda uning ofisidan xabar berishdi, deb yozadi “RBK”.
Baydenning ofisi tarqatgan bayonotda aytilishicha, hodisa 28-noyabr, shanba kuni yuz bergan. “Ehtiyotkorlik yuzasidan” 78 yoshli demokrat shifokor ko‘rigidan o‘tdi.
Baydenning korteji Delaver shtati Nyuark shahridagi ortopedning huzuriga kelgan. Kortejga jurnalistlar hamrohlik qilgan, ammo ularning mikroavtobusdan chiqishlariga yo‘l qo‘yilmagan, shu sababli ular Baydenning binoga kirib ketayotganini ko‘rmagan.
Kompyuter tomografiyasi Jo Baydenning oyog‘i ikki joyidan darz ketganini ko‘rsatdi. Shifokorning so‘zlariga ko‘ra, dastlab rentgen surati suyak singanini ko‘rsatmagan. Ammo kompyuter tomografiyasi yon va o‘rta ponasimon suyaklardagi kichik yoriqlarni tasdiqlagan.
Jo Baydenning davolovchi shifokori Kevin O’Konnorning aytishicha, demokrat bir necha hafta davomida maxsus oyoq kiyimda uxlashiga to‘g‘ri keladi.
Keyinroq amaldagi AQSh prezidenti Donald Tramp o‘z raqibiga tezroq sog‘ayib ketishni tiladi. “Tezroq tuzalib ketdi”, — deb yozdi Tramp Twitter’da Baydenning Delaverdagi kasalxonadan chiqishi aks etgan videoga izoh sifatida.
Avvalroq AQSh prezidenti Donald Tramp 2024-yilgi prezident saylovlarida o‘z nomzodini ilgari surish imkoniyatini ko‘rib chiqayotganligi va 20-yanvar — yangi prezidentning inauguratsiyasi kuni shu bilan bog‘liq tadbir o‘tkazishi mumkinligi xabar berilgan edi.
Eslatib o‘tamiz, AQShda prezidentlik saylovi 2020-yilning 3-noyabr kuni bo‘lib o‘tdi, ovozlar bir necha kun davomida hisoblab chiqildi, 7-noyabr kuni AQShning yirik OAVlari saylovda Bayden g‘alaba qozonganini ma’lum qildi. Donald Tramp esa mag‘lubiyatni tan olmadi va saylov bo‘yicha sudga murojaat qilishini bildirdi. U saylovlar qonunbuzarliklar bilan o‘tgan degan fikrda, shuningdek, saylovlarda mamlakat konstitutsiyasi buzilganini aytgan.
Keyinroq Donald Tramp ma’muriyati Jo Baydenga hokimiyatni topshirishga tayyorligini bildirgan edi. Shundan keyin Bayden o‘z ma’muriyatining asosiy a’zolarini shaxsan tanishtirdi. Shuningdek, demokrat Jozef Baydenga razvedka tomonidan davlat rahbari uchun tayyorlanadigan kunlik maxfiy hisobotlarni taqdim etishga ruxsat berildi.
Izoh (0)