“Daryo” nashri 10-martda O‘zbekiston va jahonda sodir bo‘lgan eng muhim voqealarni e‘tiboringizga havola etadi.
Nima uchun Bayden ma‘muriyati Rossiya jinoyatlari dalillarini xalqaro sudga bermoqchi emas?
Pentagon Rossiyaning Ukrainadagi jinoyatlari haqidagi dalillarni Xalqaro jinoiy sud bilan bo‘lishishiga to‘sqinlik qilmoqda.
Hozirda amerikalik harbiy rahbarlar sudga Rossiya tergovida yordam berishga qarshi, sababi ular amerikaliklarni jinoiy javobgarlikka tortilishi mumkinligidan qo‘rqmoqda. Bu haqda The New York Times tahlillarini ko'rib chiqamiz.
“Bayden ma’muriyatidan tashqari razvedka idoralari, Davlat va Adliya departamentlari dalillarni sudga taqdim etishni ma’qullaydi. Prezident Bayden haligacha boshi berk ko‘chadan chiqish yo‘lini topa olgani yo‘q”, — deyiladi xabarda.
Gap Xalqaro jinoiy sud bosh prokurori Karim Xon tomonidan bir yil avval Rossiya bosqinidan keyin boshlangan tergov haqida ketmoqda. Dalillar orasida Rossiya rasmiylarining fuqarolik infratuzilmasini ataylab nishonga olish va minglab ukrainalik bolalarni bosib olingan hududdan o‘g‘irlab ketish haqidagi qarorlar materiallari mavjud.
Ayni vaziyatda Jo Bayden ma’muriyati yopiq eshiklar ortida AQSH buni qilishi kerakmi yoki yo‘qmi degan siyosiy munozaralar ketmoqda.
Zarbalar fonida Ukraina havo hujumidan Mudofaa qurollarini qabul qilib ola boshladi
Xabaringiz bor Rossiya tomonidan Ukraina hududlariga deyarli barcha qanotli raketalar bilan zarbalar berila boshlandi va ularga Ukraina havo mudofaasi yetarlicha bardosh berolmaydi.
So'nggi ma'lumotlarga ko'ra, Ukraina Qurolli kuchlari AQSH va Germaniya va’da qilgan havo hujumidan mudofaa tizimlarining birinchi qismini oldi. Bu haqda Financial Times xabar bermoqda.
Nashr ma’lumotlariga ko‘ra, qabul qilingan kompleksdan foydalanish hali boshlanmagan. Nashrning aniqlik kiritishicha, hozirda Ukraina Niderlandiyadan ham bir nechta Patriot raketa tizimlari yetkazib berilishini kutmoqda.
2022-yilning kuzidan beri Ukrainaning energetika infratuzilmasiga zarbalar berilayotgani sabab, Ukrainani havo hujumidan mudofaa tizimlari bilan ta’minlash zarurligi bir necha bor ta’kidlangan.
2023-yil fevralida Fransiya va Italiya o‘rta masofaga mo‘ljallangan zenit-raketa komplekslarini Kiyevga topshirishga va’da berdi. Ayni paytda Ukrainada Germaniya va AQSHdan yetkazilgan mudofaa tizimlari bor.
“Vagner” tarkibida urushga jo‘natilgan o‘zbekistonlikning jasadi olib kelindi
Rossiya tomonidan urushga yuborilgan o‘zbekistonlik erkak halok bo‘ldi, qayd etilishicha u 30-yanvar kuni Ukrainada bo‘layotgan qurolli to‘qnashuvga jo'natilgan. Ellikqal’alik 43 yoshli F.X. jasadi hozirda O‘zbekistonga olib kelindi.
2019-yil noyabr oyida ishlash uchun Rossiyaga ketgan o'zbekistonlik o‘sha yilning dekabr oyida janjal sabab qamoqqa olingan va 5 yilga ozodlikdan mahrum etilgan. Fuqaro F.X. Rossiyada yashaydigan singlisiga o‘zini qamoqdan Ukrainadagi urushga yuborishmoqchiligini aytgan va 2022-yil dekabridan boshlab u aloqaga chiqmay qo‘ygan.
Ushbu shaxs bilan tanish bo‘lgan insonlarning aytishicha, u ishlagan joyga snaryad kelib tushgan. Marhumning ukasi jasadga jiddiy shikast yetgani sabab uni tanib bo‘lmagani va akasini bo‘ynidagi chandiq orqali ajratib olganini aytgan.
Avvalroq “Vagner”chilarning 90 foizi mahbuslardan iborat ekani ma’lum qilingandi. Hozirda “Vagner” chechenistonlik mahbuslarni ham Ukrainaga qarshi urushga jalb qilishni boshlagan.
Eslatib o'tamiz dekabr oyida Ukraina Qurolli kuchlari, Rossiya urushdagi yo‘qotishlarini O‘zbekiston va Tojikistondan kelgan mehnat muhojirlari hisobiga to‘ldirayotganini qayd etgan.
O‘zbekistonda yangi konstitutsiya bo‘yicha referendum o‘tkaziladi
10-mart, ya'ni bugun yangi tahrirdagi “Konstitutsiya to‘g‘risida”gi qonun loyihasi referendumini o‘tkazish haqida qaror qabul qilindi. Unga ko'ra, referendum 2023-yilning 30-aprel, yakshanba kuni o‘tkaziladi.
Bugun Oliy Majlis Qonunchilik palatasining “O‘zbekiston Respublikasi Konstitutsiyasi to‘g‘risida”gi konstitutsiyaviy qonun loyihasi muhokama qilindi. Xususan, konstitutsiya loyihasining 18-moddasi 1-qismi bo‘yicha deputat Nodira Jonibekovaning taklifi muhokama qilinib, ushbu qism yangi tahrirda eʼlon qilindi. Ya'ni “O‘zbekiston Respublikasi davlatlar va xalqaro tashkilotlar bilan ikki va ko‘p tomonlama munosabatlarni rivojlantirishga qaratilgan tinchliksevar tashqi siyosatni amalga oshiradi”.
Shuningdek, Konstitutsiya loyihasining 26-moddasi 3-qismiga quyidagi jumla qo‘shildi: “Hech narsa inson sha’ni va qadr-qimmatini kamsitish uchun asos bo‘lishi mumkin emas”.
Izoh (0)