Texas shtati Sharqiy okrugi federal sudyasi Jeremi Kernodl texaslik kongressmen, Vakillar palatasi a’zosi Lui Gomertning prezidentlik saylovlarining yakuniy natijasini qayta ko‘rib chiqish to‘g‘risidagi da’vosini qanoatlantirmadi, deb xabar beradi “RBK”.
Bir necha kongressmen tomonidan qo‘llab-quvvatlangan respublikachi Gomertning da’vosi vitse-prezident Maykl Pensga prezidentlik saylovlarida demokrat Jozef Baydenning g‘alabasini tasdiqlagan saylovchilar hay’atining ovozini bekor qilish vakolatini topshirishga yo‘naltirilgan. Saylovchilarning ovozlarini natijasi 6-yanvar kuni Pens raisligida o‘tkaziladigan Kongress yig‘ilishida e’lon qilinishi kerak. Saylovchilar hay’atining 306 ovozi Baydenga berilgan. Gomertning da’vosida Pensga mustaqil o‘zi qaror qabul qilish imkoniyatini berish taklif etilgandi.
Kongressmenlar o‘z da’vosini ayrim shtatlardagi ovozlar hisob-kitobi respublikachilarning e’tirozlariga sabab bo‘lgani bilan asoslagan. Ma’lum qilinishicha, Pensning o‘zi suddan da’voni qanoatlantirmaslikni so‘ragan, chunki bu kabi yuridik masalalar bilan AQSh vitse-prezidenti emas, Vakillar palatasi va Senat shug‘ullanishi kerak.
Sudya Kernold bu kabi davo ko‘rib chiqilishi mumkin emas, degan xulosaga kelgan.
Avvalroq AQSh prezidentiga sobiq nomzod Hillari Klinton AQSh saylovchilar hay’atini tugatish kerakligini ma’lum qilgandi.
Mavzuga doir:
Izoh (0)