Rossiya prezidenti Jo Baydenni saylovdagi g‘alaba bilan tabrikladi

Rossiya prezidenti Vladimir Putin Jo Baydenni AQSh prezidenti saylovlaridagi g‘alabasi bilan qutlab, tabrik telegrammasini jo‘natdi, deb yozadi Meduza Kremlga tayanib.

Telegrammada Putin saylangan prezidentga muvaffaqiyatlar tilab, global xavfsizlik va barqarorlik uchun alohida mas’ul bo‘lgan Rossiya va AQSh ziddiyatlarga qaramasdan, hozirgi paytda dunyo to‘qnash kelayotgan ko‘plab muammo va sinovlar hal qilinishiga hissa qo‘sha olishiga ishonch bildirdi.

Eslatib o‘tamiz, AQShda prezidentlik saylovi 2020-yilning 3-noyabr kuni bo‘lib o‘tdi, ovozlar bir necha kun davomida hisoblab chiqildi, 7-noyabr kuni AQShning yirik OAVlari saylovda Bayden g‘alaba qozonganini ma’lum qildi. Donald Tramp esa mag‘lubiyatni tan olmadi va saylov bo‘yicha sudga murojaat qilishini bildirdi. U saylovlar qonunbuzarliklar bilan o‘tgan degan fikrda, shuningdek, saylovlarda mamlakat konstitutsiyasi buzilganini aytgan.

Ko‘pchilik davlatlar rahbarlari o‘sha zahoti Baydenni saylovdagi g‘alabasi bilan tabrikladi. Ammo Kreml rasmiy natijalar e’lon qilinmagunicha, Baydenga qutlov yuborishdan bosh tortdi. Putinning matbuot kotibi Dmitriy Peskov o‘z bayonotida “rasmiy saylov natijalarini kutish ijobiy bo‘lardi”, deya fikr bildirdi. Brifingda jurnalistlar yana Peskovga savol berganda, matbuot kotibi “Rossiya prezidenti kim saylovda g‘olib bo‘lgan bo‘lsa, o‘sha shaxsga o‘z tabrigini yo‘llaydi”, — deb javob qaytardi.

15-dekabr kuni saylovchilar hay’ati ko‘pchilik ovoz bilan demokrat Jo Baydenni AQSh prezidenti saylovlarining g‘olibi deya tasdiqladi. Baydenga 306 saylovchi, uning raqibi, amaldagi AQSh prezidenti Donald Trampga 232 saylovchi ovoz berdi. G‘alaba uchun 270 ta ovoz to‘plash kerak — Bayden ushbu marradan saylovchilarning Kaliforniyadagi majlisidan keyin o‘tgan edi. Ovoz berishda 50 ta shtat va Kolumbiya okrugidan jami 538 saylovchi qatnashdi.

23-dekabrgacha saylovchilar hay’ati ovozlaridan iborat byulletenlar Vashingtonga yetkaziladi. 2021-yil 6-yanvar kuni ovozlar AQSh Kongressi Vakillar palatasi va Senatning qo‘shma majlisida hisoblab chiqiladi. 20-yanvar kuni saylangan prezidentning inauguratsiyasi bo‘lib o‘tadi.