Farg‘ona viloyatida metan zapravka 1 milliard so‘mdan ziyod tabiiy gazdan noqonuniy foydalangani aniqlandi. Bu haqda “O‘zenergoinspeksiya” matbuot xizmati xabar berdi.
Qayd etilishicha, “O‘zenergoinspeksiya” Farg‘ona viloyat hududiy boshqarmasi, viloyat prokuraturasi va gaz taʼminoti korxonasi xodimlari bilan hamkorlikda o‘tkazilgan nazorat tadbirida Farg‘ona tumanida faoliyat yuritayotgan “SNG.G.S.” MCHJga qarashli AGTKSH tabiiy gazdan noqonuniy foydalangani aniqlangan.
Xususan, o‘rganish davomida ushbu avtomobillarga gaz to‘ldirish kompressor shoxobchasining gaz hisoblagichiga tashqi taʼsir ko‘rsatilgani maʼlum bo‘lgan.
Dastlabki hisob-kitoblarga ko‘ra, davlat manfaatlariga yetkazilgan zarar miqdori jami 1 milliard 136 million so‘mni tashkil etgan.
Qoidabuzar isteʼmolchiga nisbatan belgilangan tartibda chora ko‘rish uchun tegishli hujjatlar huquqni muhofaza qiluvchi organlarga taqdim qilingan.
Bundan oldin Xorazmda zapravka 220 mln so‘mlik elektrdan noqonuniy foydalangani aniqlangani to‘g‘risida xabar berilgandi. Shuningdek, Namanganda elektrdan noqonuniy foydalanganlar jamiyat va davlat manfaatlariga to‘rt kunda 5 mlrd so‘mdan ziyod zarar yetkazgan edi.
Izoh (0)