Angliyaning “Manchester Siti” klubi bosh murabbiyi Xosep Gvardiola joriy mavsum yakunlangach, jamoani tark etishni rejalashtirmoqda va boshqa klublardan taklif kutmoqda. Bu haqda Footmercato jurnalisti Xosep Pedrerol xabar bermoqda.
Manbaga ko‘ra, ispaniyalik murabbiy Angliya Premyer Ligasidan ketishni o‘tgan yilning yozida o‘ylagan. Gvardiola Angliya terma jamoasini boshqarishni rejalashtirgan edi, biroq bu lavozimga nemis mutaxassisi Tomas Tuxel tayinlangan.
Shu sababli “shaharliklar” ustozi boshqa variantlar qolmagach “Manchester Siti”da qolishga qaror qilgan. Jurnalistning ta’kidlashicha, Xosep o‘z rejasidan voz kechmagan va baribir “Manchester Siti” bilan uzoq yillik faoliyatdan so‘ng xayrlashish niyatida.
Gvardiola shogirdlari so‘nggi uchrashuvda “Real Madrid”ga 1:3 hisobida yutqazib, Chempionlar Ligasini tark etgandi.
“Manchester Siti” navbatdagi uchrashuvni ertaga, 23-fevral kuni “Liverpul”ga qarshi o‘tkazadi. Jamoa 25 uchrashuvdan so‘ng 44 ochko to‘plab, APL turnir jadvalida 4-o‘rinda bormoqda.
Izoh (0)