“Manchester Siti” “Bayer”ning ikki yetakchi futbolchisi — Florian Virts va niderlandiyalik Frimpongni o‘z safiga qo‘shib olish niyatida. Bu haqda El Nacional xabar bermoqda.
Manbaga ko‘ra, 22 yoshli Florian Virts Kevin de Bryuyne uchun o‘rinbosar sifatida ko‘rilmoqda. Sababi belgiyalik futbolchi yozda Saudiya Arabistoniga yo‘l olishi mumkin. Florian uchun Yevropaning top klublari kurashga kirgan, biroq “Manchester Siti” rahbariyati futbolchining Xosep Gvardiola bilan ishlash istagi muhim omil bo‘lishi mumkin, deb hisoblaydi.
Frimpong transferi esa Kayl Uokerning “Milan”ga sotib olish huquqi bilan ijaraga o‘tganidan so‘ng kun tartibiga chiqdi. “Shaharliklar” rahbariyati ikkala futbolchini sotib olish uchun 200 million yevro ajratish niyatida.
Joriy mavsumda Florian Virts klub safida 32 o‘yinda maydonga tushib, 15 gol urdi va 11 golli uzatma amalga oshirdi. Transfermarkt portali uni 140 million yevroga baholamoqda.
Jeremi Frimpong esa 31 o‘yinda maydonga tushib, 3 gol va 10 assist qayd etdi. Transfermarkt uning qiymatini 50 million yevroga baholaydi.
Izoh (0)