Англиянинг “Манчестер Сити” клуби бош мураббийи Хосеп Гвардиола жорий мавсум якунлангач, жамоани тарк этишни режалаштирмоқда ва бошқа клублардан таклиф кутмоқда. Бу ҳақда Footmercato журналисти Хосеп Педрерол хабар бермоқда.
Манбага кўра, испаниялик мураббий Англия Премьер Лигасидан кетишни ўтган йилнинг ёзида ўйлаган. Гвардиола Англия терма жамоасини бошқаришни режалаштирган эди, бироқ бу лавозимга немис мутахассиси Томас Тухель тайинланган.
Шу сабабли “шаҳарликлар” устози бошқа вариантлар қолмагач “Манчестер Сити”да қолишга қарор қилган. Журналистнинг таъкидлашича, Хосеп ўз режасидан воз кечмаган ва барибир “Манчестер Сити” билан узоқ йиллик фаолиятдан сўнг хайрлашиш ниятида.
Гвардиола шогирдлари сўнгги учрашувда “Реал Мадрид”га 1:3 ҳисобида ютқазиб, Чемпионлар Лигасини тарк этганди.
“Манчестер Сити” навбатдаги учрашувни эртага, 23 февраль куни “Ливерпуль”га қарши ўтказади. Жамоа 25 учрашувдан сўнг 44 очко тўплаб, АПЛ турнир жадвалида 4-ўринда бормоқда.
Изоҳ (0)