“Manchester Siti” bosh murabbiyi Xosep Gvardiola Chempionlar ligasi doirasida “Real Madrid”ga qarshi o‘yindan avval fikrlarini bildirdi.
Gvardiola jamoasini qanchalik qiyin o‘yin kutayotganini taʼkidladi.
“‘Real‘ La Ligada 1-o‘rinda hamda ”Atletiko Madrid“ va ”Barsselona“ bilan kurash olib bormoqda. Ularni mag‘lub etish uchun ikkita yaxshi o‘yin o‘tkazishimiz kerak bo‘ladi. Ha, bizga qurʼa qiyin keldi. Ammo 24 jamoa ichida 22-o‘rinni egallaganingizda, taqdirdan iltifot kutish qiyin.
Javob o‘yinini uyda, muxlislaring ko‘z oldida o‘tkazish har doim yoqimli, biroq biz bunga loyiq bo‘lolmadik. Albatta, biz avvalgidek barqaror holatda emasmiz. Lekin yillar davomida juda yaxshi to‘p tepgan futbolchilarimga ishonaman”, – deydi ispaniyalik mutaxassis.
Gvardiola Madrid klubi hujum chizig‘ida ajoyib futbolchilar yig‘ilganini aytdi.
“Ular turlicha – qisqa va uzun paslar bilan hujumga o‘tadi. Biz o‘z o‘yinimiz haqida o‘ylashimiz kerak. Agar biz g‘alaba qozonsak, bu mavsumning qolgan qismi uchun katta turtki bo‘lib xizmat qiladi. Men qanday o‘ynashimiz kerakligini bilaman... Bilaman, yigitlar ham ertangi o‘yinni intiqlik bilan kutishmoqda”, – deydi Xosep.
“Manchester Siti” – “Real” bellashuvi 11-fevraldan 12-fevralga o‘tar kechasi 01:00 da boshlanadi.
Izoh (0)