AQSHning maqsadi Markaziy Osiyo mamlakatlari va Rossiya iqtisodiyotlarini bir-biridan ajratish bo‘lishi kerak, dedi AQSH Xalqaro taraqqiyot agentligi (USAID) direktori yordamchisining o‘rinbosari Anjali Kaur Vakillar palatasining tashqi ishlar qo‘mitasi eshituvlarida.
Bu amalga oshishi uchun idora mintaqada “inson salohiyati rivojlanishiga, iqtisodiy o‘sishga, iqlim o‘zgarishlariga qarshi kurashga” yordam berishga harakat qiladi. Vashington Ukrainadagi ziddiyat fonida Markaziy Osiyodagi sheriklar bilan aloqalarni mustahkamlash imkoniyatini qidirmoqda, dedi Kaur.
AQSH, Buyuk Britaniya, Yaponiya, Avstraliya, Kanada, Yaponiya, Yevroittifoq mamlakatlari va boshqa davlatlar Rossiya 24-fevralda Ukrainada boshlagan harbiy operatsiyaga qat’iy sanksiyalar bilan javob qildi. Ushbu mamlakatlar rahbariyati Rossiyani yakkalab qo‘yish, uni global iqtisodiyotda ishtirok etish imtiyozlaridan mahrum qilish niyatini ma’lum qildi. Rossiya hukumati buni amalga oshirib bo‘lmasligini, Moskva esa shunday sheriklikdan manfaatdor bo‘lgan davlatlar bilan hamkorlik qilishda davom etishini aytdi.
Do‘st bo‘lmagan davlatlar bilan iqtisodiy hamkorlik uchun imkoniyatlar cheklanganidan keyin, Moskva e’tiborini Osiyoga yo‘naltirishga qaror qildi. Tashqi ishlar vaziri Sergey Lavrov may oyida Markaziy Osiyo mamlakatlari bilan Rossiyani strategik sheriklik aloqalari, “aksariyati bilan esa — ittifoqdoshlik aloqalari” bog‘lab turishini aytgandi. Lavrovning so‘zlariga ko‘ra, Qozog‘iston, Qirg‘iziston, Tojikiston, Turkmaniston va O‘zbekiston bilan 900 dan ziyod ikki tomonlama shartnomalar va hukumatlararo bitimlar tuzilgan, savdo-iqtisodiy aloqalar rivojlanmoqda.
Moody’s ekspertlari mart oyidagi ma’ruzasida Rossiyaga qarshi sanksiyalar MDH mamlakatlari iqtisodiyotiga salbiy ta’sir ko‘rsatishi haqida ogohlantirgandi. Xususan, u yerda Rossiyadan pul o‘tkazmalari hajmi qisqaradi, Markaziy Osiyo uchun esa bu daromadlarning muhim qismidir. Bundan tashqari, tahlilchilar ushbu davlatlarda ishsizlik darajasi o‘sishini prognoz qilmoqda.
Izoh (0)