Lavrov G‘arb davlatlari Markaziy Osiyoga “jiddiy bosim” o‘tkazayotganini aytdi

Rossiya tashqi ishlar vaziri Sergey Lavrov G‘arb Markaziy Osiyo davlatlariga “bosim” o‘tkazib, Moskvaga qarshi sanksiyalarga qo‘shilishini talab qilayotganini aytdi. Bu haqda “TASS” xabar berdi.

Vazirning so‘zlariga ko‘ra, Yevropa Ittifoqi, AQSH va Yaponiya Markaziy Osiyo davlatlaridan “G‘arb bilan urushda Rossiya mag‘lub bo‘lar” ekan, Moskva bilan hamkorlik qilishdan bosh tortishni talab qilmoqda. Lavrov bu borada Yevropa davlatlari “g‘olib tomon”ga o‘tishni taklif qilayotganini ta’kidladi

“Bunday og‘zaki ta’sirlardan tashqari, tahdidlar bilan “jiddiy bosim” mavjud: ‘Rossiyaga sanksiyalarni chetlab o‘tishga yordam berishga yo‘l qo‘ymang, aks holda bizning bozorlarimizni va mamlakatlaringizga kiritmoqchi bo‘lgan sarmoyalarni yo‘qotasiz’”, — deb tushuntirdi diplomat.

Lavrovning qayd etishicha, Markaziy Osiyo davlatlari hukumatlari bunday tahdidlarni hisobga olishga majbur.

“Biz har bir do‘st davlatimizdagi barcha xo‘jalik operatorlari ertalab tribunaga chiqib: “Rossiyaga qarshi sanksiyalarga qarshimiz”, deyishlarini talab qilmaymiz. Bizga ularning hech biri sanksiyalarga qo‘shilmagani kifoya”, — dedi TIV rahbari.

Avvalroq Rossiya tashqi ishlar vaziri Qozog‘iston va O‘zbekiston bilan “gaz ittifoqi”ni yaratish g‘oyasida hech qanday geosiyosiy o‘yin yo‘qligi haqida gapirgandi. U Rossiya, Qozog‘iston va O‘zbekiston umumiy gaz uzatish tizimiga ega qo‘shni davlatlar bo‘lib, ular mavsumiy iste’molning eng yuqori cho‘qqilarini hisobga olgan holda gaz ta’minotida uzilishlar bo‘lmasligidan manfaatdorligini qayd etgan.