Iqtisodiy tadqiqotlar va islohotlar markazi O‘zbekiston ko‘chmas mulk bozoridagi so‘nggi o‘zgarishlar bo‘yicha tahliliy ma’lumotlarni “Daryo”ga taqdim qildi.
2025-yilning birinchi yarim yilligi yakunlariga ko‘ra, respublikada uy-joy savdolari o‘tgan yilning shu davriga nisbatan o‘n foizga oshib, 136 ming 500 xonadonga yetgan. Iyun oyining o‘zida 21 mingta ko‘chmas mulk oldi-sotdi bitimlari ro‘yxatdan o‘tkazilgan. Bu ham o‘tgan yilning shu oyiga nisbatan uch foizdan ko‘p.
Hududlar bo‘yicha holat
Viloyatlar kesimida ko‘chmas mulk bozori barqaror o‘sishda davom etmoqda. Eng katta o‘sish Jizzax viloyatida 29,9 foiz, Navoiy viloyatida 18,3 foiz va Surxondaryo viloyatida 17,7 foiz qayd etilgan. Ayni paytda Toshkent viloyatida savdo hajmi 2,6 foizga kamaygan.
Ikkilamchi uy-joy bozori
Iyun oyida O‘zbekistonda ikkilamchi bozordagi uy-joy narxlari may oyiga nisbatan uncha katta bo‘lmagan, uchdan bir foiz atrofida oshgan. Yillik hisobda esa narxlar qariyb ikki foizga ko‘tarilgan.
Jizzax viloyatida iyun oyida uy-joy narxlari biroz pasaygan bo‘lsa-da, yil davomida o‘sish qariyb o‘n ikki foizni tashkil etgan. Surxondaryo, Xorazm, Namangan viloyatlari va Qoraqalpog‘iston Respublikasida ham uy-joy narxlari yildan yilga oshib bormoqda.
Toshkent shahridagi holat
Toshkentda ikkilamchi uy-joy bozori biroz sekinlashgan. O‘tgan yilga nisbatan narxlar deyarli besh foizga pasaygan. Yangi qurilgan uylar segmentida ham pasayish kuzatilgan, ammo bu faqat ikki foiz atrofida.
Ikkilamchi bozorda eng katta tushish Mirzo Ulug‘bek, Yashnobod va Chilonzor tumanlarida qayd etilgan. Yangi qurilgan uylar esa Uchtepa, Yunusobod va Shayxontohur tumanlarida sezilarli arzonlashgan.
Ijara bozori barqaror
Toshkent shahrida iyun oyida uy-joy ijara narxlari o‘zgarmagan. Hozirda ijara narxi bir kvadrat metr uchun o‘rtacha 8 dollar atrofida.
Mirobod, Shayxontohur va Yakkasaroy tumanlarida ijara narxlari eng yuqoriligicha qolmoqda — bir kvadrat metr uchun o‘rtacha 10 dollar.
Yillik hisobda ijara narxlari ikki foizdan ko‘proq pasaygan. Eng katta tushish Uchtepa, Yashnobod va Chilonzor tumanlarida kuzatilgan.
O‘zbekistonda 2024-yilda 100 264 ta xonadon aholiga topshirilgani ma’lum qilindi.
2024-yilda 2 044 ta ko‘p kvartirali uy foydalanishga topshirilgan. 2022–2024-yillar davomida jami 4 920 ta ko‘p kvartirali uy qurilib, ularda 221 mingdan ortiq xonadon aholiga topshirilgan.
Yillik ko‘rsatkichlar quyidagicha:
- 2022-yilda 1 433 ta uy (56 115 ta xonadon);
- 2023-yilda 1 443 ta uy (65 528 ta xonadon);
- 2024-yilda 2 044 ta uy (100 264 ta xonadon).
Ta’kidlanishicha, nogironligi bo‘lgan shaxslar, yetim bolalar va kam ta’minlangan oilalar uchun mo‘ljallangan ijtimoiy ahamiyatga ega uy-joylar soni ham ortib bormoqda.
Shuningdek, “Yangi O‘zbekiston” massivlarida olib borilayotgan qurilish ishlari ham izchil davom ettirilmoqda. 2025-yilga kelib bunday massivlar soni 29 tadan 56 taga yetkazilgan. Ayni paytda ushbu massivlarda 890 ta uy qurilib, 31 692 ta xonadon foydalanishga topshirilgan.
Uy-joy sotib olish uchun subsidiyalar
Vazirlar Mahkamasining 2024-yil 11-noyabrdagi qarori bilan uy-joy sotib olish uchun subsidiyalar ajratish tartibiga o‘zgartirish va qo‘shimchalar kiritildi. Qaror bilan subsidiyalar bilan qoplanadigan foiz to‘lovlari miqdoriga ham o‘zgartirish kiritildi. Endilikda yangi kreditlar uchun yillik 12 foizdan yuqori qismi, 2025-yildan boshlab esa Markaziy bankning asosiy stavkasidan ortiq qismi qoplanadi.
Boshlang‘ich to‘lov va foizlarning bir qismini qoplash uchun subsidiyalar Iqtisodiyot va moliya vazirligi tomonidan besh ish kuni ichida to‘lanadi.
Izoh (0)