Adliya vazirligi bolalarni maktabgacha ta’lim bilan qamrab olish darajasi oshirilishini ma’lum qildi.
Unga ko‘ra, “2025—2026-yillarda bolalarni maktabgacha ta’lim bilan qamrab olish darajasini oshirish bo‘yicha qo‘shimcha chora-tadbirlar to‘g‘risida”gi hukumat qarori qabul qilindi. Qaror bilan, 2025—2026-yillarda bolalarni maktabgacha ta’lim bilan qamrab olish darajasini oshirish bo‘yicha chora-tadbirlar dasturi hamda 3-7 yoshli bolalarni maktabgacha ta’lim bilan qamrab olishning maqsadli ko‘rsatkichlari tasdiqlandi.
Shuningdek, quyidagilar tashkil etiladi:
- aholining yashash darajasi va to‘lov qobiliyati yuqori bo‘lgan (kambag‘al oilalar kam bo‘lgan) mahallalarda davlat-xususiy sheriklik asosida nodavlat bog‘chalar;
- olis va chekka (tuman va shaharlar markazida joylashmagan) mahallalarda oilaviy nodavlat bog‘chalar;
- aholining to‘lov qobiliyati past (kambag‘al oilalar nisbatan ko‘p bo‘lgan) hamda demografik o‘sish darajasi yuqori bo‘lgan mahallalarda davlat, shuningdek, xalqaro moliya institutlari kredit va grantlari hisobidan davlat-xususiy sheriklik asosida nodavlat bog‘chalar;
- ijtimoiy soha muassasalarining bo‘sh binolarida qisqa muddatli guruhlar.
Qayd etilishicha, 2025-yil yakunigacha kambag‘al oilalar farzandlarini maktabgacha ta’lim bilan qamrab olish ta’minlanadi.
Shavkat Mirziyoyev “Ko‘p o‘lchovli kambag‘allik bo‘yicha global muloqot” xalqaro konferensiyasi ishtirokchilariga tabrik yo‘llaganida muhtoj oilalarda tug‘ilgan bolalarning salohiyatini to‘liq ro‘yobga chiqarish bo‘yicha barcha imkoniyatlarni yaratib berish davlatimiz siyosatida muhim o‘rin egallaganini aytib o‘tgandi.
Keyingi yillarda bolalarning maktabgacha ta’lim bilan qamrov darajasi 27 foizdan 74 foizga oshirildi. Bolalar o‘rtasidagi kambag‘allik darajasi oxirgi uch yilda 22 foizdan 14 foizga pasaydi.
“So‘nggi uch yilda mamlakatimizda ko‘makka muhtoj 3 million aholining turmush sharoitini yaxshilab, kambag‘allik darajasini 17 foizdan 11 foizga tushirishga erishdik”, degan edi prezident.
O‘zbekistonda 2025-yil 1-yanvardan kambag‘al oilalar farzandlari davlat maktabgacha taʼlim tashkilotlariga imtiyozli asosda qabul qilinadi.
Izoh (0)