Samarqand hokimi Olimpiya va Paralimpiya o‘yinlari sovrindorlariga uy sovg‘a qildi

Samarqand shahrida Tokioda bo‘lib o‘tgan XXXII yozgi Olimpiya va XVI Paralimpiya o‘yinlarining samarqandlik sovrindor va ishtirokchilarini taqdirlash marosimi bo‘lib o‘tdi. Unda viloyat hokimi Erkinjon Turdimov qatnashib, barcha Olimpiyachilarni erishilgan muvaffaqiyat bilan qutladi.

Paralimpiya chempioni Husniddin Norbekovga Samarqand shahridan uch xonali uy, Paralimpiya o‘yinlari kumush medal sohibi Parvina Samandarova va dzyudo bo‘yicha Olimpiya o‘yinlari bronza medali egasi Davlat Bobonovga ikki xonali uy kaliti topshirildi.

Shuningdek, Olimpiya o‘yinlarida qatnashish uchun litsenziyani qo‘lga kiritgan sportchilarga Samarqand shahridan boshlang‘ich to‘lovi to‘langan ikki xonali uy hamda ularning murabbiylariga 25 million so‘mdan pul mukofoti berildi.

Ta’kidlash joiz, Samarqanddan Olimpiada o‘yinlarida 10 nafar, Paralimpiya o‘yinlarida esa 4 nafar sportchi ishtirok etidi.

Avvalroq Paralimpiya o‘yinlari sovrindorlari bo‘lgan o‘zbekistonlik sportchilarga Prezident sovg‘asi sifatida avtomobil va Toshkent shahridan uylar topshirilgandi, Andijon viloyati hokimi Paralimpiya o‘yinlari oltin medali sovrindori Bobur Omonovga Andijon shahridan 2-xonali xonadon sovg‘a qilgan, Qashqadaryo viloyatida esa Paralimpiya o‘yinlarida viloyat sha’nini himoya qilgan Olimpiadaning kumush medali sovrindorlari — Asila Mirzayorova hamda Dovurxon Karamatovlarga Prezident sovg‘asi — Gentra avtomobillari topshirilgandi.