Президент Шавкат Мирзиёев бошчилигида олимпия ва паралимпия ҳаракати, ихтисослаштирилган ва оммавий спортни янги босқичга олиб чиқиш ҳамда аҳоли жисмоний фаоллигини ошириш чора-тадбирлари бўйича видеоселектор йиғилиши ўтказилди. Давлат раҳбари паралимпия чемпиони Асила Мирзаёрова билан мулоқот қилди.
“Асила қизимни кўрганимдан жуда хурсандман. Қизим, бахтли бўлгин. Яқинда тўйларингни эшитиб, вакилимни юбордим. Сизларга бахт-саодат тилайман. Энг ишончли, мардона, мард қизларимдан бирисан. Ҳаммага қаҳрамон қизим бор, деб айтганман. Сенга ҳам телефонда қаҳрамон қизим деганман. Илоҳим, бахтли бўлинглар. Сизларнинг бахт-у камолларингни кўриш ҳаммамизга насиб қилсин. Қизим, ишларингда муваффақият. Келажакда Ўзбекистонга шода-шода медаллар олиб келишингга ишонаман”, деди президент.
Асила Мирзаёрова давлат раҳбари табрикларини етказишганини айтди.
“Оилавий миннатдор бўлдик. Лос-Анжелесда бўлиб ўтадиган Паралимпия ўйинларига кучли тайёргарлик кўришни мақсад қилиб қўйганман. Турмуш ўртоғим билан бирга спорт соҳасидамиз. Улар ҳам спорт мураббийи ҳисобланади”, деди спортчи.
Давлат раҳбари Асиланинг турмуш ўртоғи мураббий бўлганидан хурсандлигини таъкидлади.
“Бахтингизни топиб, мураббийингиз билан турмуш қурганларинг, қадрли оиласизлар. Илоҳим турмушларинг мустаҳкам бўлиб, Янги Ўзбекистоннинг янги оиласи ва янги қаҳрамонлар пайдо бўлишига ишонаман”, деди президент.
Асила, ўз навбатида, Лос-Анжелесда бўлиб ўтадиган Паралимпия ўйинларида битта олтинни иккита қилишга ваъда берди.
Асила Мирзаёрова енгил атлетика бўйича Токио—2020 кумуш медали, Париж—2024 олтин медали соҳиби ҳисобланади. Шунингдек, Мирзаёрова ҳисобида иккита жаҳон чемпионлиги ҳам мавжуд.
“Дарё” 2023 йилда Асила Мирзаёрова билан суҳбат қилган эди. Унда Асила ҳаётидаги қийинчиликлар, спортга кириб келиши ва қисқа муддатда кўзга кўринарли натижаларга эришгани ҳақида гапириб ўтган эди.
“Оромгоҳдаги воқеадан кейин ҳаётимда кутилмаган вазият бўлган. Албатта, қийинчиликлар бўлган, ёлғизланиб қолганман. Аввал кўп спорт турларига қизиққанман, ундан кейин эса нима қилиш ҳақида кўп ўйладим. Оилам билан биргаликда бу қийинчиликларни енгиб ўтдик, Секин-секин йиллар давомида кўникишни бошладим. Шундан сўнг яна спортга қайтдим.
Спорт менга ҳамма нарсани берди. Биринчи навбатда, умидсизликка тушишдан қутқарган. Ўзимга бўлган ишончни қайтарган. Олдингига нисбатан анча руҳий ҳолатимни тиклаб олганман. Спортнинг менга берган энг катта нарсаси шу”, деган эди Асила.
Изоҳ (0)