SpaceX kompaniyasi asoschisi Ilon Mask 24-avgust kuni navbatdagi Starship raketasining uchirilishini so‘nggi daqiqada bekor qildi. Bu haqada The Guardian xabar berdi.
Kompaniya bunga yerdagi tizimda muammo sabab bo‘lganini ma’lum qilgan. Navbatdagi uchirish sanasi hozircha noma’lum. Bu Starship’ning o‘ninchi marta parvozga urinishidir. Bungacha bo‘lgan 9 ta test parvozidan atigi 4 tasi muvaffaqiyatli bo‘lgan. So‘nggi urinishlarda kuchli portlashlar yuz berib, raketa qoldiqlari Karib dengizi orollarigacha yetib borgan edi.
Bu safargi sinov parvozi Texasdagi Starbase majmuasida bo‘lib o‘tishi va ilk bor Starlink sun’iy yo‘ldoshlarining sinov versiyasini uchirish rejalashtirilgan edi. Ilon Mask ijtimoiy tarmoqlarda odatdagidek faol chiqishlar qilmay, faqatgina “Starship uchishga tayyorlanmoqda” degan post bilan cheklangan.
Starship hozirda insoniyat tarixidagi eng yirik raketa bo‘lib, Mask uni Oy va Marsga parvozlar uchun to‘liq qayta ishlatiladigan transport vositasiga aylantirmoqchi. Unga ko‘ra, 2026-yilda astronavtsiz, 2029-yilda esa insonlar bilan Marsga parvozlar yo‘lga qo‘yilishi rejalashtirilgan.
Ayni paytda, Starship parvozlari ekologik muammolarni ham yuzaga keltirmoqda. Ekologlar AQSH—Meksika chegarasi va Gavayidagi parvozlar mahalliy ekotizimga salbiy ta’sir ko‘rsatishi mumkinligidan xavotir bildirmoqda.
Izoh (0)