Shavkat Mirziyoyev raisligida o‘tkazilayotgan videoselektor yig‘ilishida O‘zbekistonda Prezident olimpiadasi tashkil etilishi ma’lum qilindi.
Aytilishicha, yilda ikki marta hududlarda olimpiya sport turlari bo‘yicha “Yangi O‘zbekiston Olimpiya cho‘qqilari” musobaqalarini o‘tkazish yo‘lga qo‘yiladi. Tuman va viloyat sovrindorlarini hokimlar rag‘batlantirib boradi.
Viloyat bosqichi g‘oliblari har yili 10—20-dekabr kunlari Olimpiya shaharchasida o‘tkaziladigan Prezident olimpiadasida ishtirok etadi. Musobaqa g‘oliblari esa uy, avtomobil kabi qimmatbaho sovg‘alar bilan taqdirlanadi.
Birinchi va ikkinchi o‘rinni olgan sportchilar Respublika olimpiya va paralimpiya markaziga qabul qilinadi. Bunda 1-2 kurs o‘quvchilariga stipendiya to‘lash yo‘lga qo‘yiladi.
Los-Anjeles — 2028 Olimpiya o‘yinlarida O‘zbekistonni kuchli o‘ntalikka kiritish maqsad qilingan.
“Sport – bu avvalo tinchlik elchisi, har bir davlat uchun milliy g‘urur manbasi”, deya ta’kidlagan prezident.
Majlisda qayd etilishicha, so‘nggi to‘rt yilda byudjetdan sportga ajratilayotgan mablag‘ 1,5 trillion so‘mdan 3 trillion so‘mga oshdi, murabbiylarning o‘rtacha maoshi 2 barobar ko‘paydi, 101 ta yirik sport obyektlari yangidan qurildi, 67 tasi rekonstruksiya qilindi.
Shuningdek, sportchilarni kelgusi Olimpiadaga tayyorlash uchun 300 milliard so‘m ajratilishi belgilandi.
Izoh (0)