Ijtimoiy tarmoqlarda bir ayol o‘qituvchini o‘quvchilar oldida kaltaklagani aks etgan video tarqalib, ko‘plab muhokamalarga sabab bo‘ldi. “Millar” dasturida holat yuzasidan ma’lumot berildi.
Keltirilishicha, ayol farzandini kaltaklaganlikda aylab, o‘qituvchini do‘pposlagan. Holat yuzasidan unga nisbatan sud hukmi o‘qildi.
Unga ko‘ra, ayol Jinoyat kodeksining 277-moddasi 2-qismida nazarda tutilgan jinoyatni sodir etganlikda aybli deb topildi va ikki yil muddatga ozodlikdan cheklash jazosi tayinlandi.
Eslatib o‘tamiz, “Pedagogning maqomi to‘g‘risida”gi qonun asosida pedagoglarning o‘z kasbiy faoliyatini yuritishi uchun tashkiliy-huquqiy shart-sharoitlar yaratilib, ularning ijtimoiy himoyasi taʼminlanishi va huquqlari amalga oshirilishi uchun kafolatlar berilishi orqali ularning maqomi tan olinadi. Qonunda pedagoglar o‘z kasbiy faoliyatini amalga oshirishi uchun ularning huquqlari qatʼiy belgilab qo‘yilgan.
Avvalroq Sirdaryoda o‘qituvchi 1-sinf o‘quvchisini qo‘liga igna sanchish bilan jazolagani haqida xabarlar tarqalgandi. Surishtiruv davomida yuqoridagi holat tasdig‘ini topmagan. Sirdaryoda ikki o‘quvchi qiz o‘qituvchini urgani aks etgan video tarqaldi. Holat viloyat Maktabgacha va maktab ta’limi boshqarmasi va soha mas’ullari nazoratiga olindi.
Qashqadaryoning Shahrisabz tumanidagi maktabda o‘qituvchi 5-sinf o‘quvchisini urib jarohatladi. Qarshi shahridagi maktabda o‘qituvchi va o‘quvchi yoqalashgani tasvirlari tarqaldi. Algebra fani o‘qituvchisi va 10-sinf o‘quvchisi bo‘lgan ikki qiz o‘rtasida o‘zaro kelishmovchilik kelib chiqib, og‘zaki tortishib qolgan. Ularning xatti-harakatlariga chora ko‘rish uchun sudga berilgan.
Toshkentdagi maktabda ayol dastlabki ish kunida o‘quvchini kaltaklagani ham keng muhokamalarga sabab bo‘lgandi. Ayol jazolanib, maktab direktori ishdan olingandi.
Izoh (0)