Toshkent shahridagi Shayxontohur tumanida joylashgan maktab o‘quvchilari orasida sil kasalligi tarqalgani haqida xabarlar paydo bo‘ldi. Sanepidqo‘mita va Sog‘liqni saqlash vazirligi bunga munosabat bildirdi.
Qo‘mita axborotiga ko‘ra, 2024-yilning 26-dekabrida Shayxontohur tumanidagi 59-sonli umumta’lim maktabining 11-sinf o‘quvchisida sil kasalligi aniqlangan va shu kuni Shahar Bolalar ftiziatriya shifoxonasiga yotqizilgan. Bemor bilan muloqotda bo‘lgan 22 nafar o‘quvchi va maktabning 30 nafar o‘qituvchisi 2025-yilning 4-yanvaridan boshlab rentgenografiya, diaskin test tekshiruvlaridan o‘tgan.
Kasallik aniqlangan o‘quvchi ambulator sharoitda davolanmoqda. Epidemiologik surishtiruv o‘tkazish natijasida bemorning oila a’zolari ham tegishli tekshiruvlardan o‘tkazilib, kasallik aniqlanmagan.
Sanepidqo‘mita mutaxassislari tomonidan ushbu maktabda epidemiologik o‘rganishlar olib borilishi natijasida maktabda sanitariya talablarining qo‘pol ravishda buzilishi, sil kasalligi bilan kasallangan bemorni erta aniqlanmagani va o‘z vaqtida chora-tadbirlarni tashkil etilmagani hamda pedagoglarning davriy tibbiy ko‘rikdan o‘tmagani ma’lum bo‘ldi. Aniqlangan kamchiliklar yuzasidan ushbu maktab direktoriga ma’muriy bayonnoma rasmiylashtirildi.
Qayd etilishicha, maktabda bemor bilan muloqotda bo‘lgan o‘quvchi va o‘qituvchilar maxsus tekshiruvdan o‘tkazilgan, ular orasida kasallikni yuqtirib olganlar aniqlanmagan. Amaldagi tartibga ko‘ra ularda 6 oydan so‘ng qayta tekshiruv o‘tkazilishi rejalashtirilgan.
“Shu o‘rinda ortiqcha vahimaga o‘rin yo‘qligini, vaziyat nazorat ostida ekanini eslatib o‘tamiz”, deyiladi qo‘mita munosabatida.
Sog‘liqni saqlash vazirligi matbuot xizmatining bildirishicha, bugungi kunda 59-sonli umumta’lim maktabida davlat dasturi asosida kapital rekonstruksiya ishlari olib borilayotgani sababli ushbu ta’lim muassasasining boshlang‘ich sinf o‘quvchilari 115-umumta’lim maktabida, yuqori sinf o‘quvchilari esa tumandagi 82-sonli umumta’lim maktabida o‘qishni davom ettirmoqda.
21-yanvarda 82-sonli umumta’lim maktabida tegishli zararsizlantirish va dimlash tadbirlari takroriy olib borildi. 2025-yil 22-yanvar kuni esa yalpi tozalash va shamollatish tadbirlari o‘tkazildi. Shuningdek, 115-sonli umumta’lim maktabida ham 23-yanvar kuni tegishli zararsizlantirish va dimlash tadbirlari takroriy tashkil etildi.
Izoh (0)