Muxlislari tomonidan “O‘zbek rep qiroli” deya e’tirof etiladigan reper Shohrux 31-yanvar sanasida 39 yoshni qarshi oldi. U o‘zbek shou-biznesidagi o‘ta yopiq va maxfiy hayot tarzini olib boradigan kam sonli san’atkorlardan. Xonanda 2007-yildan beri deyarli intervyu bermaydi, ijtimoiy tarmoqlardagi sahifalarida esa asosan deputatlik faoliyatiga oid ma’lumotlar bilan bo‘lishadi. Quyida reperning intervyularida oshkor qilgan ma’lumotlari asosida uning hayoti va ijodiga nazar tashlaymiz.
Asli ism-familiyasi Shohrux Shodmonov bo‘lgan Shohrux reper 1986-yilning 31-yanvarida Toshkent shahrida dunyoga kelgan. Shohrux 2004— 2005-yillarda o‘tkazilgan Tarona taqdimotida “Yil yutug‘i” va “Yil kashfiyoti” kabi nominatsiyalarda g‘olib bo‘lgan.
Shohrux reperning ilk konsert dasturi 2006-yilning 17—19-fevral kunlari “Xalqlar do‘stligi” san’at saroyida bo‘lib o‘tgan. Ushbu konsertda kuylangan 20 ta qo‘shiqning 17 tasi jonli ijro etilgan. 2007-yilning 22—25-fevral kunlari o‘tkazilgan konsertida esa reper 22 ta qo‘shiqning barchasini jonli kuylagan.
Shohrux reper 2022-yilning 21-oktabr kuni ijodining 15 yilligi munosabati bilan yubiley konsertini taqdim etdi. Uning yana bir konsert dasturi 2024-yilning 1-noyabrida Humo arena muz saroyida anshlag tarzda o‘tkazildi.
“Al-vakil” guruhi solisti Muzaffarning ijodiga ta’siri
Shohrux bolaligida “Al-vakil” guruhini tinglagani hamda ma’lum muddat uning solisti Muzaffar bilan ijodiy hamkorlik qilgani haqida aytib o‘tgan.
— Muzaffar bilan birjaga ish bo‘yicha borganimizda tanishib qolganmiz. Muzaffar o‘sha yerda ishlab yurardi. U bilan duet kuylaganmiz. Menga she’rlar yozib bergan.
Yoqmaydigan qo‘shig‘i haqida
— “Yoroney” qo‘shig‘im o‘zimga uncha manzur bo‘lmagan, lekin muxlislar yaxshi qabul qilgan. Bu qo‘shiq hattoki uning muallifi Bobur Umarovga ham yoqmagan. Ikkalamiz bu qo‘shiqni yozib, bir yil ushlab turganmiz. Chiqarsak qanaqa bo‘larkan deb ikkilanganmiz. Lekin muvaffaqiyatli qo‘shiq chiqdi.
To‘ylarga deyarli bormasligi sababi
— To‘ylarga juda ko‘p chaqirishadi. Lekin hammasiga ham boravermayman. Chunki to‘ylarda odamlar dam oladi, spirtli ichimliklar ichishadi. Menga esa bunday muhit yoqmaydi. O‘zim bilgan, tanigan insonlar bo‘lsa albatta boraman.
2016-yilning 12-may kuni Toshkentdagi to‘yxonalardan birida Shohrux Zlata ismli qizga uylandi. Bu to‘y reperning muxlislari orasida muhokamalarga sabab bo‘ldi. Sababi reper Instagram’dagi sahifasiga o‘g‘li bilan tushgan suratlarini muntazam joylashtirib kelgan. Reper muxlislarining savollariga javob tariqasida Zlata bilan nikohdan o‘tib, oila davrasida kichik tadbir o‘tkazgani, katta to‘yni esa qilishga imkon bo‘lmagani haqida so‘zlab berdi.
Shohrux va Zlata juftligi 2014-yilda o‘g‘il, 2017-yilda qiz farzandli bo‘lishgan. Reper 2020-yilda uchinchi marta ota bo‘lganini, uning oilasida yana bir o‘g‘il farzand dunyoga kelganini ma’lum qilgan.
Ayoli bilan qanday tanishgani haqida
— Rafiqam bilan kafeda tanishganmiz, sevib turmush qurganmiz. Inson boshqa bir insonni sevib qolsa, uning qaysi millatga mansub ekanligining ham ahamiyati yo‘q. Ayolim meni san’atkor sifatida tanirdi, lekin mening muxlisim bo‘lmagan. U boshqa yo‘nalishdagi musiqalarni eshitadi. Biz sof o‘zbekcha oilamiz, ayolimni ham “o‘zbek qilib qo‘yganmiz”. Deyarli barcha urf-ofatlarimiz va an’analarimizni o‘rganib olgan.
“Rep men uchun birinchi o‘rinda emas”
Shohrux agar bor e’tiborini ijodga qaratganida u ancha ko‘p natijalarga erishishini, biroq san’at uning uchun asosan xobbi ekanligini bir necha marta takrorlagan.
— Maktabda o‘rtacha o‘qiganman. O‘shandayoq reper bo‘lish orzusida yashardim. “Al-vakil” guruhining qo‘shiqlarini eshitib yurardim. Xorij estradasidan Eminem va Tupakni eshitardim. San’at men uchun birinchi o‘rinda emas, agar birinchi o‘ringa qo‘yganimda erishganlarim hozirgidan 2-3 marta ko‘proq bo‘lardi.
Shohrux bilan duet kuylash narxi — 5 ming dollarmi?
Bir necha yil avval repga qadam qo‘yayotgan san’atkorlar Shohrux bilan duet aytish uchun 5 ming dollar to‘lashi kerak, degan gaplar chiqqan.
— Bunaqa gapni birinchi marta eshitishim. Menga duet bilan murojaat qiladigan reperlar haqiqatdan ham rep aytishni bilishi kerak. Keyin kuylanadigan qo‘shiq matni sifatli bo‘lishi kerak. Shundagina hamkorlik qilishimiz mumkin. Shu paytgacha hecham pulga rep aytmaganman. Takliflar ko‘p bo‘ladi, lekin taklif qilishdan oldin yaxshilab uning to‘g‘ri yoki noto‘g‘riligini o‘ylab ko‘rish kerak.
Hamkasblari bilan qanday munosabatda?
— Hamma hamkasblar bilan bir xil munosabatdaman. Salom-aligimiz bor. Lekin hech kim bilan kafe-restoranga yoki choyxonaga borib o‘tirmayman. Chunku hammaning o‘z “krugi” bor.
Deputatlik faoliyati
2019-yil 22-dekabr kuni Shohruh Shodmonov o‘z nomzodini O‘zLiDePdan ko‘rsatgan holda Toshkent shahar Chilonzor tumani kengashiga Xalq deputati etib saylangan. U 2024-yilning 27-oktabr kuni yana bir bor deputat sifatida saylandi. Shohrux Instagram’dagi sahifasida o‘zining siyosiy faoliyatini batafsil yoritib kelmoqda.
Izoh (0)