“Manchester Siti” futbolchisi Manuel Akanji Abdukodir Husanovning “shaharliklar” tarkibidagi debyut o‘yiniga izoh berdi.
“Husanov uchun o‘yin unchalik muvaffaqiyatli boshlanmadi ammo u o‘zini a’lo darajada tikladi. “Chelsi”ga qarshi birinchi o‘yinni o‘ynash oson emas. Biz uni qo‘llab-quvvatlashga harakat qildik va u yaxshi uddaladi. Men uni kuchli futbolchilarga qarshi o‘yinda murakkab vaziyatlarga tushirmaslikka harakat qildim.
Men uni ruhlantirdim va unga ortiqcha o‘ylamaslikni, faqat oldinga intilishni aytdim. Masalan, keyingi harakatida to‘pni ortga, Edersonga uzatib xavfsizroq harakat qilishni yoki yakkakurashlarda yutib, ishonchni qaytarish kerakligini ta’kidladim”, deydi Akanji.
Bundan tashqari himoyachi o‘zbekistonlik futbolchi ingliz tilini yaxshi tushunishini ma’lum qildi.
“U ingliz tilini fransuz tiliga qaraganda yaxshiroq tushunishini aytdi, shuning uchun men u bilan ingliz tilida gaplashaman. Menimcha, u ingliz tili ko‘nikmalarini yaxshilaydi — bu ayniqsa markaziy himoyachilar uchun muhim. U ko‘p narsani tushunadi, ammo hozircha o‘z fikrlarini yetkazib bera olmayapti. Tez orada bu o‘zgaradi”, dedi shveysariyalik futbolchi.
Ma’lumot uchun, Abduqodir Husanov 23-tur doirasida bo‘lib o‘tgan “Chelsi”ga qarshi o‘yinda (3:1) ilk bor “Manchester Siti” safida maydonga tushdi. 2-daqiqada uning xatosidan so‘ng “Chelsi” hisobni ochdi. Ammo keyinchalik futbolchi ishonchli harakat qildi va “aristokratlar”ning ko‘plab hujumlarini qaytarishda asosiy rol o‘ynadi.
Uchrashuvda Gvardiola shogirdlari 3:1 hisobida g‘alaba qozonib, APLda 4-o‘ringa ko‘tarildi.
Izoh (0)