Yevropa Chempionlar Ligasi yarim finalidan o‘rin olgan “Manchester Siti”—“Real Madrid” uchrashuvidan (4:0) keyin ikki jamoa murabbiyi o‘z fikrlarini bildirdi.
“Real Madrid” murabbiyi Karlo Anchelotti raqib g‘alabaga loyiqligi, bunday mag‘lubiyatga uchrash og‘riqli ekani va o‘yindan keyin Pep Gvardiolani tabriklagani haqida gapirdi.
“Raqib yaxshiroq o‘ynadi va g‘alaba qozonishga loyiq edi. Ular o‘yin boshida bizga jiddiy bosim o‘tkazdi va bu ish berdi. Hujumlarni boshlashda qiynaldik, ular esa hisobda oldinga chiqib oldi. Bundan keyin o‘yinga qaytib olishga qiynaldik. Ikkinchi taymda ham harakat qildik, lekin o‘xshamadi.
Hozir o‘yinga baho berishdan ma’no yo‘q. Bunday mag‘lubiyatga uchrash og‘riqli. Juda ham og‘riqli, lekin bunday holatlar ham yuz beradi.
Chempionlar Ligasi yarim finaliga chiqasiz, kuchli raqibga duch kelasiz, o‘yinda mag‘lub bo‘lasiz va finalsiz qolasiz. Hechqisi yo‘q, bundan xulosa chiqarish va keyingi musobaqada yaxshiroq ishtirok etish kerak.
O‘yindan keyin Gvardiolani tabrikladim. Chunki uning jamoasi yaxshi o‘ynadi. O‘tgan mavsumda ularni mag‘lub etgandik, bu mavsumda esa uning navbati keldi. Futbol shunday tuzilgan — ba’zida mag‘lubiyatga ham uchraysiz”, — dedi Karlo Anchelotti.
“Manchester Siti” murabbiyi Pep Gvardiola bunday ustunlikni kutmagani, bir yil oldingi o‘yin va trebl qilish imkoniyati haqida fikr bildirdi.
“Bu qadar ustunlik qilishimizni kutmagandim. Bir yil oldingi og‘riqli hissiyot bilan o‘ynadik. Juda shiddatli va intensiv harakat qildik. Avvalgi o‘yinda insayd o‘yinchini orqaroqqa joylashtirgandim, bu o‘yinda esa yuqoriroq qo‘ydim. Ko‘proq bo‘sh zonalar topa oldik va moslashuvchan harakat qildik. Biz juda yaxshi o‘ynadik.
Kroos aytganidek, bir yil avvalgi o‘yinda oltita yoki yettita gol urganimizda, keyingi voqealar bo‘lmasdi. Lekin “Bernabeu” bu — “Bernabeu”. Uyda biz ham o‘z kuchimizni his qilamiz, bu yerda “Arsenal”, “Real” va “Bavariya”ni yengdik. O‘tgan yilda Kurtua nimalar qilgani haqida o‘yladim. “Oltin to‘p” Benzemaga berildi, lekin Kurtua ham bu sovringa haqli edi.
Oradan bir yil o‘tib Chempionlar Ligasi finaliga chiqdik. Agar taslim bo‘lmasang, futbol va hayot doim imkon beradi.
Treblga yaqinmiz va futbolchilar ham bu haqda o‘ylashi mumkin. Trebldan uchta g‘alaba uzoqdamiz. Har bir turnirda bittadan o‘yinni yutishimiz kerak. Bunga qodirmiz. APLda yana bir o‘yinda g‘alaba qozonishimiz kerak, keyin esa Angliya Kubogida qo‘shnilarimiz (“Manchester Yunayted”) bilan o‘yin kutib turibdi. Chempionlar Ligasi finalida esa italyan klubiga qarshi maydonga tushamiz. Chempionlar Ligasi finalida o‘ynash qanchalik yoqimli ekanini so‘z bilan ta’riflab bo‘lmaydi. Bundan zavq olmoqchimiz”, — dedi Pep Gvardiola.
Izoh (0)