Apple kompaniyasi tez kunlarda yangi iPhone SE hamyonbop telefonini taqdim etishni rejalashtirmoqda, deb xabar berdi Bloomberg agentligi jurnalisti Mark Gurman manbalarga tayanib.
Apple qurilmani kelasi hafta, ya’ni 10–16-fevral kunlari taqdim etishi kutilmoqda, sotuvlar esa fevral oyi oxirida boshlanadi. Manbalarga ko‘ra, Apple iPhone’ning arzon versiyasini ishga tushirishga bag‘ishlangan taqdimot o‘tkazmaydi va qurilmani o‘z saytida taqdim etmaydi.
Mark Gurmanning aniqlik kiritishicha, iPhone SE’ning yangi versiyasi iPhone 14’ga o‘xshash bo‘ladi. Telefon katta ekran, Face ID, A18 chipi, shuningdek, USB-C quvvatlash konnektoriga ega bo‘ladi. Bu Qualcomm chipi o‘rniga Apple tomonidan ishlab chiqilgan uyali modemga ega bo‘lgan birinchi iPhone bo‘ladi. Qurilma Apple Intelligence sun’iy intellekt tizimini qo‘llab-quvvatlaydi. Yangi iPhone SE’da qurilmaning joriy versiyasida mavjud bo‘lgan “Uyga” tugmasi bo‘lmaydi.
Bloomberg muallifining ta’kidlashicha, AQSHning ko‘plab mintaqalaridagi Apple do‘konlarida bir necha haftadan beri iPhone SE’ning joriy versiyasi zaxiralari qisqarmoqda. Shu bilan birga, telefon hali ham Apple veb-saytida mavjud, ammo ba’zi konfiguratsiyalar, masalan, 256 gigabayt xotiraga ega qizil versiya mavjud emas — u mart oyidan keyin ommaga taqdim etiladi. Bundan tashqari, AQSHda iPhone 14 va 14 Plus zaxiralari qisqarmoqda. Yevropa Ittifoqi mamlakatlarida iPhone SE ham, iPhone 14 ham yo‘q, chunki ular mahalliy qonunlar talablariga javob bermaydi, ularga ko‘ra quvvatlash porti USB-C bo‘lishi kerak.
Yangi iPhone SE’ning narxi hozircha noma’lum. Asosiy modelning joriy versiyasi 429 dollar turadi.
Ehtimol, Apple qurilma narxini oshiradi, chunki unda yangi funksiyalar paydo bo‘ladi va dizayn yangilanadi, ammo katta ehtimol bilan narx 500 dollar atrofida qoladi, deb taxmin qilmoqda Gurman.
Apple vakili izoh berishdan bosh tortdi.
iPhone SE — Apple tomonidan birinchi marta 2016-yilda taqdim etilgan boshlang‘ich darajadagi iPhone modeli. 2022-yilda chiqarilgan telefonning avvalgi versiyasi “Uyga” tugmasi va Face ID’siz yagona iPhone bo‘lib qolgan.
IPhone SE’da mazkur tugmadan voz kechish Apple 2007-yilda taqdim etilgan birinchi iPhone’ning mashhur interfeysidan butunlay voz kechishini anglatadi, deb yozadi Bloomberg.
Gurmanning ta’kidlashicha, Apple kompaniyasi 2025-yilda iPhone 17 va 17 Pro’ni, jumladan, o‘ta yupqa versiyasini taqdim etmoqchi, taqdimot sanasi hali noma’lum. Bundan tashqari, 11-fevral kuni yangi PowerBeats Pro 2 quloqchinlarining taqdimoti bo‘lib o‘tadi, ular Apple’ning o‘rnatilgan pulsometrga ega birinchi quloqchinlari bo‘ladi. Shuningdek, yilning birinchi yarmida kompaniya M4 chipiga ega yangi MacBook Air, arzonroq iPad hamda yangilangan iPad Air modellarini taqdim etishi kutilmoqda.
Izoh (0)