Britaniya raqobat va bozorlar boshqarmasi (CMA) Amerikaning Apple va Alphabet Inc tarkibiga kiruvchi Google kompaniylariga nisbatan yangi tergov boshlashi mumkin. Bu haqida Financial Times xabar berdi.
Regulyator avvalroq Apple siyosati iPhone uchun uchinchi tomon brauzerlarida yangi funksiyalarni amalga oshirishni murakkablashtirishini aniqlagandi.
CMA, shuningdek, Google va Apple o'rtasidagi daromadlarni taqsimlash bo'yicha kelishuv “iOS mobil brauzer bozorida raqobat qilish uchun ularning moliyaviy rag'batlarini sezilarli darajada kamaytiradi”, degan xulosga kelgan.
Regulyator foydalanuvchilarning fikr-mulohazalarini to'plab, keyin to'liq tekshiruv o'tkazish to'g'risida qaror qabul qilishi kutilmoqda.
Apple kompaniyasi CMA tekshiruvi natijalariga rozi emasligini e'lon qildi.
22-noyabr kunidagi birja savdolari davomida Apple aksiyalari 0,3 foizga oshdi, Alphabet’niki esa 1,7 foizga arzonlashdi.
Avvalroq AQSH Adliya vazirligi Google’dan Chrome’ni sotishni talab qilayotgani xabar qilingandi.
Bunga kompaniyaning onlayn qidiruv bozorini noqonuniy monopoliyaga olgani sabab sifatida ko‘rsatilgan.
“Monopoliyaga qarshi idoralar Google Chrome’ni sotishini xohlashmoqda, chunki brauzer kompaniyaning qidiruv tizimi qo‘llaniladigan asosiy joy”, deydi Bloomberg agentligi bilan suhbatlashgan manba.
Oktyabr oyida Meta, Google, Apple va boshqa elektron xizmatlar ko‘rsatuvchi xorijiy kompaniyalar O‘zbekistonda 100 mlrd so‘mdan ortiq soliq to‘lagani ma’lum qilingandi.
Izoh (0)