Taniqli tahlilchi Min-Chi Kuo Apple kompaniyasi 2021-yilda iPhone 12 lineykasini qaytarishini — o‘lchami 5,4 dyuymdan 6,7 dyuymgacha to‘rtta smartfonni taqdim etishi mumkinligini ma’lum qildi, deb xabar berdi Hi-Tech.Mail.ru.
Ta’kidlanishicha, smartfonlar dizayni o‘zgarishsiz qoladi, Apple o‘z qurilmalarining kamerasi yaxshilashga e’tibor qaratadi. iPhone 13 Pro va 13 Pro Max smartfonlariga 6 linzali obyektiv va f/1,8 diafragmali juda keng burchakli yangi modul qo‘shiladi. Yangi iPhone 12’ga hozirda f/2,4 obyektivi va beshta linza o‘rnatilgan.
Bundan oldin tarqalgan xabarlarda iPhone 13 ekrani 120 gertsli yangilanish chastotasini qo‘llab-quvvatlashi mumkinligi haqida yozilgandi. Shuningdek, 2021-yilda 1 terabayt ichki xotiraga ega ilk “ayfon” ham paydo bo‘lishi kerak. Biroq Min-Chi Kuo ushbu ma’lumotni tasdiqlamagan.
Eslatib o‘tamiz, Apple’ning 15-sentabrdagi taqdimotida Watch SE hamyonbop “aqlli” soati hamda iPad planshetlari, 13-oktabrda esa to‘rtta iPhone 12 smartfoni taqdim etilgandi. Apple’ning navbatdagi taqdimoti esa 10-noyabr kuni bo‘lib o‘tadi.
Izoh (0)