Apple kompaniyasi Siri virtual yordamchisidan foydalanuvchilarning roziligisiz suhbatlarini yozib olishda foydalanganlikda ayblanib, sud jarayonini hal qilish uchun 95 million dollar to‘lashga rozi bo‘ldi.
Da’voga ko‘ra, Apple Siri’ga o‘n yildan ko‘proq vaqt davomida iPhone va boshqa qurilmalarda suhbatlarni yozib olishga yashirincha ruxsat bergan. Bundan tashqari, yozuvlar odamlar Siri’ga “Hey, Siri” faollashtirish iborasi bilan murojaat qilmagan hollarda ham sodir bo‘lgan. Yozib olingan suhbatlarning bir qismi reklama beruvchilarga uzatilgan.
31-dekabrda tuzilgan kelishuv bitimida Apple har qanday qonunbuzarlikni “inkor etishda davom etishini” aytgan.
The Washington Post shartnoma shartlari (hali sud tomonidan tasdiqlanmagan) Apple kompaniyasidan 2019-yil oktyabrgacha Siri orqali to‘plangan audioyozuvlarni o‘chirib tashlashni tasdiqlashini talab qilishini yozgan.
Agar kelishuv tasdiqlansa, 2014-yil 17-sentyabrdan 2024-yil oxirigacha iPhone va boshqa Apple qurilmalariga ega bo‘lgan foydalanuvchilar sudga murojaat qilib, Siri bilan jihozlangan har bir mos qurilma uchun 20 dollargacha pul olishlari mumkin, deya xabar beradi Associated Press.
Sud hujjatlariga ko‘ra, sudga da’vo qilish huquqiga barcha foydalanuvchilarning 3-5 foizi ega bo‘lishi aytilgan. Da’vogarlar Siri tinglash uchun faollashtirilganini payqashganliklari va tasodifiy faollashuv “maxfiy bo‘lishi kerak bo‘lgan suhbat” paytida sodir bo‘lganligi haqida guvohlik berishlari kerak.
Izoh (0)