Panama prezidenti Xose Raul Mulino AQSH davlat kotibi Marko Rubio bilan muzokaralardan so‘ng mamlakat “Bir makon — bir yo‘l” tashabbusi doirasida Xitoy bilan o‘zaro anglashuv memorandumini davom ettirmasligini aytdi. Bu haqda PBS xabar berdi.
Muzokaralarda Panama kanalini AQSH kuch bilan qaytarib olishi bo‘yicha tahdid qilinmagan.
“Lekin AQSH prezidenti Donald Tramp Xitoyning kanal hududidagi mavjudligi suv arteriyasini 1999-yilda Panamaga topshirish to‘g‘risidagi shartnoma shartlarini buzadi, degan qarorga kelgan. Chunki kelishuv kanalning doimiy neytralligini ta’minlashni ko‘zda tutadi”, dedi Panama prezidenti.
Rubio Panama rahbariga AQSH prezidenti Xitoyning mintaqaga ta’siri ostida Panama kanalidagi status-kvoni saqlanib qolishini istamasligini aytdi. U Panamadan Xitoyning kanalga ta’sirini kamaytirish choralarini ko‘rishni talab qildi. Aks holda AQSH ikki davlat o‘rtasidagi kanalni ekspluatatsiya qilish to‘g‘risidagi shartnomaga muvofiq zarur choralarni ko‘radi.
“Mening hukumatim 2017 yilgi ‘Bir makon — bir yo‘l’ tashabbusi bo‘yicha o‘zaro anglashuv memorandumini uzaytirmaydi”, degan qarorga keldi Xose Raul Mulino.
“Bir makon — bir yo‘l” Xitoyning “Ipak yo‘li iqtisodiy kamari” va “XXI asr dengiz ipak yo‘li” loyihalarini birlashtirish bo‘yicha 2013-yilda ilgari surilgan tashabbusidir.
Maqsad — ko‘proq mamlakatlar ishtirokidagi xalqaro savdo-investitsiya loyihalarini faollashtirish va manfaatdor davlatlar sarmoyasidan foydalanish, shuningdek, iqtisodiy hamkorlik va savdoni kuchaytirish uchun infratuzilmani rivojlantirish.
“Bir makon — bir yo‘l” tashabbusi Janubi-Sharqiy Osiyo, Afrika, Yaqin Sharq va Yevropaga tovarlarni tez va arzon tashish uchun quruqlik va dengiz savdo yo‘llarini birlashtirishni nazarda tutadi.
Izoh (0)