O‘zbekiston Bojxona qo‘mitasi mobil qurilmalarni mamlakatga olib kirishda bojxona deklaratsiyasini to‘ldirish talab etilishini eslatdi.
“Kurbanoff.net” Telegram kanali telefonning IMEI kodini ro‘yxatdan o‘tkazishda avvalgidek xorijga borishning o‘zi yetarli emasligini, mobil qurilmani import qilishda deklaratsiya qilish kerakligini yozdi.
“Saytda ro‘yxatdan o‘tishda bojxona bazasidan ma’lumotlar qidiriladi. Agar bazada ma’lumot bo‘lmasa, u holda telefon bojxona qiymatining 30 foizi miqdorida boj to‘lash kerak bo‘ladi”, dedi kanal muallifi.
Bojxona qo‘mitasi bergan ma’lumotga ko‘ra, agar fuqaro O‘zbekistonga samolyotda kirib kelayotgan bo‘lsa 2 donagacha, agar poyezdda yoki avtotransport vositasida yoki piyoda kirib kelayotgan bo‘lsa har olti oyda bir marotaba 1 dona telefonni olib kirishi mumkin.
Qanday olib kirilishidan qat’iy nazar olib kiriladigan telefon bojxona deklaratsiyasida ko‘rsatilishi shart. Bu telefonning UzIMEI tizimidan ro‘yxatdan o‘tkazishda kerak bo‘ladi. Agar deklaratsiya to‘ldirilmasa, qurilmani UzIMEI tizimida ro‘yxatga olish uchun telefon qiymatining 30 foizi miqdorida boj to‘lash talab qilinadi.
Samolyotda olib kelinganda bu telefonlarning jami narxi 2000 dollardan, poyezdda — 1000 dollardan, avtotransportda yoki piyoda olib kelinganda — 300 dollardan oshmasligi kerak. Cheklangan normalardan oshsa, qiymatning ortiqcha qismiga 30 foiz boj undiriladi.
“Agar telefonlarni qo‘ldan, turli savdo rastalaridan yoki onlayn do‘konlardan xarid qilsangiz, u holda ularning UzIMEI tizimidan ro‘yxatdan o‘tganini albatta tekshiring. Agar telefon tizimda ro‘yxatdan o‘tmagan bo‘lsa, u holda bojxona to‘lovlarini o‘zingiz to‘lashingizga to‘g‘ri keladi”, deyiladi qo‘mita xabarida.
“O‘zbekiston telekommunikatsiya tarmoqlarini boshqarish respublika markazi” DUK ham O‘zbekistonga yangi mobil qurilmalar olib kirishda bojxona deklaratsiyasini to‘ldirish majburiyligini bildirdi. Ta’kidlanishicha, yangi talab 2024-yil boshida joriy etildi. Bojxona qo‘mitasi UzIMEI tizimi operatori bilan birgalikda oktabr oyida tizimlarning ma’lumot almashinuvini yakunladi.
2024-yil 28-yanvardan boshlab hukumatning 2023-yil 26-oktyabrdagi “O‘zbekiston Respublikasi hududida foydalanilayotgan, sotish yoki shaxsiy foydalanish uchun olib kiriladigan mobil qurilmalarni ro‘yxatga olish tartibi yanada takomillashtirilishi munosabati bilan O‘zbekiston Respublikasi hukumatining ayrim qarorlariga o‘zgartirish va qo‘shimchalar kiritish to‘g‘risida”gi qarori kuchga kirgan. Unda jismoniy shaxslar tomonidan telefonlar olib kirilganda, bojxona to‘lovlaridan ozod qilinadigan tovarlarni olib kirishning cheklangan me’yorlaridan qat’i nazar, deklaratsiya to‘ldirilishi shartligi belgilangan.
Izoh (1)
Ajoyib