Chirchiqda itlar otib o‘ldirilayotgani rad etildi

Toshkent viloyati IIBB “Viloyatda itlarni ommaviy otishmoqda” mazmunida ko‘plab yolg‘on xabarlar tarqatilayotganini ma’lum qildi.

Qayd etilishicha, Piskent tumanida itlarni ov quroli bilan otgan shaxslarning videosi internetda katta shov-shuv ko‘targani ortidan ayrim norasmiy Telegram kanallar viloyat bo‘ylab boshqa shahar-tumanlardan ham shu mazmundagi xabarlarni ommaviy tarqatishga kirishdi.

Xususan, Chirchiq shahrida ham itlar otilayotgani haqida xabar tarqatilgan. Viloyat IIBB buni rad etib, yolg‘on axborot tarqatish javobgarlikka sabab bo‘lishini eslatdi.

Toshkent viloyatining Piskent tumanida noma’lum shaxslar ov miltig‘ida itlarni otayotgani aks etgan videoni “Mehr va oqibat” hayvonlarni himoya qilish jamiyati e’lon qilgandi. Jamiyatga fuqaro E.Z.dan u istiqomat qiladigan shaharchada itlar otilgani, natijada E.Z.ning bir iti o‘lgani, ikkinchisi og‘ir ahvolda veterinar klinikada ekani to‘g‘risida xabar kelib tushgan. Guvohning so‘zlariga ko‘ra, itlarni otishga kelganlar orasida ichki ishlar, hayvonlarni tutish bo‘linmasi xodimlari va ovchilar bo‘lgan.

Viloyati IIBB matbuot xizmati mazkur holat nazoratga olinganini, voqeada ishtirok etgan fuqarolarda bo‘lgan ov qurollari tegishli tartibda olib qo‘yilganini bildirdi. Hozirda holat yuzasidan hududiy IIB tomonidan tegishli hujjatlar rasmiylashtirib, sudga yuborish chorasi ko‘rilmoqda.

Hayvonlarga nisbatan shafqatsizlik

O‘zbekistonda hayvonlarga nisbatan shafqatsiz munosabatda bo‘lganlik uchun jinoiy javobgarlik belgilangan. Jinoyat kodeksining 202-1-moddasiga ko‘ra, hayvonlarga nisbatan shafqatsiz munosabatda bo‘lish, ya’ni g‘arazli yoki boshqa past niyatlarda ularni qiynoqqa solish yoxud ularga azob berish, ularning o‘limiga yoki mayib bo‘lishiga olib kelgan harakatlar uchun ma’muriy jazo qo‘llanilganidan keyin takror sodir etilgan bo‘lsa, BHMning 25 baravaridan 50 baravarigacha miqdorda jarima yoki 240 soatgacha majburiy jamoat ishlari yoki 1 yilgacha axloq tuzatish ishlari yoxud 6 oygacha ozodlikni cheklash yoki 6 oygacha ozodlikdan mahrum qilish bilan jazolanadi.

Bundan bir necha yil avval “Daryo” O‘zbekistonda qarovsiz qolgan jonivorlarga bo‘lgan munosabat aslida qanday holatda ekanini aniqlashga harakat qilgandi. Jizzax shahar obodonlashtirish boshqarmasi huzuridagi it ovlov brigadasi brigadiri Erkin Islomov havas uchun qo‘lga qurol olib, o‘q uzilmasligini, odamlar “Ko‘chadagi daydi it, mushuk kechasi uxlatmayapti”, “Farzandimni tishlab oldi”, “Ko‘chada bemalol yura olmayapmiz” mazmunida shikoyat qilinganda, shu murojaatlar bo‘yicha tegishli joylarga borilishini aytgandi.