Сурхондарё вилоятида ноқонуний ов қилиб юрганлар аниқланди, деб хабар берди Экология вазирлиги матбуот хизмати.
Маълум қилинишича, Музработ тумани “Ипак йўли” маҳалласида яшовчи фуқаро Х.Р., Шўрчи тумани А.Сафаров СИУда яшовчи фуқаро Ш.Р., “Охунбобоев” СИУда яшовчи фуқаро Б.О., “Алпомиш” маҳалласи фуқароси А.Б., “Бунёдкор” маҳалласида яшовчи фуқаро Р.Х., фуқаро Ч.А. ва М.А. рухсатномасисиз ов қилиш талабларига риоя қилмаган.
Улар ўзига тегишли бўлган ов қуроллари билан Музработ туман “Ипак йўли” маҳалласидаги Шолипоя массивида ов қилиб юрганлиги маълум бўлди.
Мазкур ҳолат юзасидан фуқароларнинг ҳар бирига нисбатан Маъмурий жавобгарлик тўғрисидаги кодекснинг 90-моддаси 1-қисмига (ов қилиш ва балиқ овлашнинг тақиқланган қуролларини ёки воситаларини тайёрлаш, олиб кириш, сақлаш, ташиш ёки юбориш, олиш ёхуд сотиш) асосан БҲМнинг 20 баробари — 7,5 млн сўмдан, жами 52,5 млн сўм маъмурий жарима чораси қўлланилди.
Аввалроқ Айдар-Арнасой кўлларида 2024 йили ноқонуний ов оқибатида табиатга 1,7 млрд сўмлик зарар етказилгани ҳақида хабар берилганди.
Шунингдек, Навоийда ноқонуний балиқ овлаган шахслар табиатга 6,3 млрд зарар етказгани ҳақида хабар берилганди.
Бундан ташқари, Сурхондарё вилояти Шўрчи туманида ноқонуний балиқ овланиши натижасида табиатга 1,4 миллиард сўм зарар етказилган эди.
Ўзбекистон ҳудудида 2025 йил 1 сентябрдан 2028 йил 1 январгача ов қилишга мораторий жорий қилиниши мумкинлиги айтилганди.
Изоҳ (0)