Yozuvchi Sobir O‘nar muallifligidagi “Bibisora” asari (qissa va hikoyalar to‘plami) nashriyot tomonidan ruxsatsiz chop etilganligi uchun tegishli chora ko‘rilishi yuzasidan murojaat kelib tushgan. Bu haqda Adliya vazirligi axborot xizmati xabar bermoqda.
Murojaat o‘rganilganida nashriyot tomonidan “Bibisora” asari huquq egasi ruxsatisiz, tegishli shartnoma tuzmasdan nashr etilgani hamda 2 ming adadda chop etib, tarqatilganligi aniqlangan. Holat yuzasidan adliya organlari tomonidan jamiyat rahbariga nisbatan ma’muriy huquqbuzarlik to‘g‘risida bayonnoma rasmiylashtirilib, sudga yuborilgan.
Jinoyat ishlari bo‘yicha Shayxontohur tuman sudining qaroriga asosan jamiyat rahbariga Ma’muriy javobgarlik to‘g‘risidagi kodeksning 177 prim 1-moddasi (mualliflik huquqini va turdosh huquqlarni buzish) bilan 1 million 700 ming so‘m jarima jazosi qo‘llanilgan.
Ma'lumot uchun, Sobir O‘nar 1964-yil 25-fevralda Samarqand viloyatining Qo‘shrabot tumanida tug‘ilgan. ToshDUning jurnalistika fakultetini tamomlagan. 1986-yildan boshlab “Yoshlik” jurnalida adabiy xodim sifatida faoliyatini boshlab, bo‘lim mudiri, bosh muharrir o‘rinbosari, bosh muharrir vazifalarida ishlab kelgan.
Uning asarlari respublika nashriyotlarida 1984-yildan buyon chop etib kelinadi. “Orzular bilan burkangan qishloq” (1989), “Uzoq dalalar ortida” (1990), “Chambilbelning oydalasi” (2006), “Bibisora” (2011) kitoblar muallifi. Qoraqalpoq adibi X.Tojimurodovning “Ov hangomalari” (1990) hamda turk yozuvchisi Bakir Yulduzning “Karbalo fojiasi” qissasini o‘zbek tiliga tarjima qilgan.Adib 2022-yilning avgustida “Do‘stlik” ordeni bilan mukofotlangan.
O‘zbekiston yozuvchilari uyushmasi a’zosi Sobir O‘nar 2022-yili 58 yoshida vafot etgan.
Izoh (0)