Meta ikki yillik taqiqdan so‘ng AQSH sobiq prezidenti Donald Trampning Facebook va Instagram akkauntlarini tikladi. Reuters agentligi bunga birinchilardan bo‘lib e’tibor qaratdi.
Yanvar oyida Meta kompaniyasining global masalalar bo‘yicha prezidenti Nik Klegg siyosatchining Facebook va Instagram’dagi akkauntlarini tiklash rejasini e’lon qilgan edi. Uning tushuntirishicha, blokirovka Trampning 2024-yilgi prezidentlik saylovlarida qatnashish rejalari bilan bog‘liq holda bekor qilinadi.
Shu bilan birga, Klegg taʼkidlaganidek, ijtimoiy tarmoqlar qoidalarini qaytadan buzsa, AQSH sobiq prezidenti qolganlarga nisbatan jiddiyroq jazoga tortiladi: agar Tramp Meta qoidalariga zid kontentni chop etsa, tegishli post oʻchirib tashlanadi, akkauntning o‘zi yana bir oydan ikki yilgacha bo‘lgan muddatga bloklanadi.
Tramp 34 va 23 million obunachiga ega bo‘lgan Facebook va Instagram akkauntlariga qaytadimi yoki yo‘qmi, noma’lum. Ilgari uning akkaunti Twitter tomonidan blokdan chiqarilgan edi, biroq hozircha siyosatchi u yerda hech narsa chop etmagan.
Ijtimoiy tarmoqlar 2021-yil 6-yanvarda bo‘lib o‘tgan Kapitoliyga hujumdan keyin Donald Trampning akkauntlarini bloklab qo‘ygandi.
Xususan, Meta Tarmp kompaniyaning ijtimoiy tarmoqlarida tartibsizliklarni maqtagani uchun uning sahifasini to‘sib qo‘ygan.
Izoh (0)