AQSHning sobiq prezidenti va prezidentlikka nomzod Donald Tramp Meta korporatsiyasi asoschisi Mark Sukerbergni 2020-yilda unga qarshi fitna uyushtirishni rejalashtirganlikda aybladi va 2024-yilda ham bu takrorlansa, qamoq bilan tahdid qildi. Bu haqda Politico Trampning yangi kitobiga tayanib xabar berdi.
![](/static/2024/08/29/photo_2024-08-29_20-05-21-4jIx6vGN.jpg)
OAV xabarlariga ko‘ra, sobiq prezidentning “Amerikani qutqarish” nomli yangi kitobi 3-sentyabr kuni ommaga taqdim etiladi. Unda Tramp Sukerbergni 2020-yilgi prezidentlik saylovlarida unga qarshi fitna uyushtirganlikda ayblagan.
Qayd etilishicha, kitobda Tramp va Sukerbergning Oq uyga tashrifi chog‘ida o‘tkazilgan uchrashuv aks etgan fotosurat bor. Shuningdek, sobiq prezident Sukerbergni 2020-yilgi saylovlar vaqtida maxsus qutilar o‘rnatganlikda ham ayblagan, Tramp buni unga qarshi fitnaning bir qismi deb atagan.
OAV xabarlariga ko‘ra, bu bilan Tramp Sukerberg va uning rafiqasi Priskilla Channing 2020-yilgi saylovlar davomida saylov infratuzilmasini moliyalashtirish uchun qilgan 420 million dollarlik hissasini nazarda tutgan.
Tramp, shuningdek, u va uning jamoasi 2024-yilgi prezidentlik poygasi vaqtida Sukerbergni diqqat bilan kuzatishini aytib, biznesmen noyabrdagi prezidentlik saylovlarida noqonuniy ish qilsa, unga umrbod qamoq jazosi bilan tahdid qilgan.
AQSHda prezidentlik saylovlari joriy yilning 5-noyabr kuni bo‘lib o‘tadi. Demokratik partiyadan vitse-prezident Kamala Harris, Respublikachilar partiyasidan esa Donald Tramp ishtirok etmoqda.
Izoh (0)