Meta kompaniyasining Facebook va Instagram ijtimoiy tarmoqlari AQSH sobiq prezidenti Donald Trampning akkauntlarini blokdan chiqarmoqchi. Bu haqda kompaniya bayonotiga tayanib, “RBK” xabar berdi.
“Yaqin haftalarda janob Trampning Facebook va Instagram’dagi akkauntlarini blokdan chiqaramiz”, — deyiladi bayonotda.
Agar ushbu tarmoqlarda taqiqlangan kontent chop etilsa, u olib tashlanadi, Tramp esa qoidabuzarlik darajasiga qarab bir oydan ikki yilgacha muddatga yana bloklanadi.
Meta Amerika sobiq rahbarining akkauntlarini 2021-yilning yozida bloklagandi, bunga Tramp tarafdorlarining Kapitoliy binosiga bostirib kirgani sabab bo‘ldi. Tramp ijtimoiy tarmoqni senzurada aybladi.
Ma’lumot uchun 2021-yil 6-yanvar kuni AQSH Kongressi a’zolari Donald Trampning prezidentlik saylovlarida mag‘lub bo‘lganini tasdiqlash uchun yig‘ilgan vaqtda Trampning tarafdorlari Kongressga bostirib kirgan. Politsiya bir necha soat o‘tibgina namoyishchilarni Kapitoliydan haydab chiqarishga muvaffaq bo‘lgan. Huquq-tartibot organlari xodimlari o‘qotar qurol, dubinka, ko‘zdan yosh oqizuvchi gazdan foydalangan. Hodisada Kapitoliy xavfsizlik xodimi bilan birgalikda, besh kishi halok bo‘lgan, 140 nafar politsiyachi yaralangan.
Hujum oldidan Tramp 2020-yilgi saylov natijalarini tan olishdan ochiqchasiga bosh tortgan va ovoz berish jarayonida ko‘plab qonunbuzarliklarga yo‘l qo‘yilganini ta’kidlab, saylov natijalarini qayta ko‘rib chiqishni talab qilgandi.
Keyinroq Trampning o‘zi Kapitoliyga hujumni qoralab chiqdi.
2022-yilning dekabr oyida AQSH Kongressi Vakillar palatasining Kapitoliyga hujumni tergov qilish bo‘yicha saylovchi qo‘mitasi Donald Trampga nisbatan jinoiy ish qo‘zg‘atishni tavsiya qildi.
Trampning taʼkidlashicha, demokratlar uning 2024-yilda prezidentlikka nomzodini qoʻyishiga toʻsqinlik qilmoqchi. Noyabr oyi o‘rtalarida u prezidentlik saylovlarida qatnashish niyati borligini ma’lum qilgandi.
Izoh (0)