“Liverpul” “PSJ” futbolchisi uchun 100 mln yevro to‘lashga tayyor

Angliyaning “Liverpul” klubi Parijning “PSJ” jamoasida to‘p surayotgan 22 yoshli futbolchi Bredli Barkolyani o‘z safiga qo‘shib olishni istamoqda. Bu haqda jurnalist Sasha Tavolyeri o‘zining ijtimoiy tarmoqdagi sahifasida xabar berdi.

Manbaning yozishicha, “qizillar” futbolchi uchun kamida 100 million yevrolik taklif tayyorlamoqda. Klub “Nyukasl” hujumchisi Aleksander Isak transferini amalga oshira olmayapti. Sababi “hakkalar” rahbariyati Isakni sotmasligini ma’lum qilgan. Shundan so‘ng klub zaxira rejasiga o‘tgan va Barkolya bilan shartnoma imzolash uchun harakat boshladi. Agar “Liverpul” ushbu transferni amalga oshira olsa, bu yozgi transfer oynasidagi eng yirik xaridlardan biriga aylanishi mumkin.

Bredli o‘tgan mavsum “PSJ” safida jami 64 ta o‘yinda maydonga tushib, o‘z hisobiga 21 ta gol va 21 ta golli uzatma yozdirib qo‘ygan. Unga bo‘lgan talabning yuqoriligi, UEFA Chempionlar Ligasi hamda Fransiya chempionatida ko‘rsatgan o‘yinlari bilan bog‘liq. 

• Bredli va parijliklar o‘rtasidagi shartnoma 2028-yilning yozigacha amal qiladi.
• Transfermarkt portali futbolchining qiymatini 70 million yevroga baholamoqda.