Исроил ҲАМАСни ўт очишни тўхтатиш тўғрисидаги битим шартларини бузганликда айблади. Бу ҳақда Deutsche Welle хабар берди.
Айбловга кўра, ҲАМАС гаровга олинганларни озод қилишнинг биринчи босқичи доирасида исроиллик Арбел Яҳудни қўйиб юбормаган. Тирик ва ҳалок бўлган асирлар рўйхатини ҳам тақдим этмаган. Исроилнинг ўғирланганлар ва бедарак йўқолганларнинг оилалари билан ишлаш бошқармаси бу ҳақда маълум қилди.
“Кечаги босқични амалга ошириш давомида ҲАМАС келишувларни икки марта бузди: Арбел Яҳуд ҳали ҳам озод қилинмаган, биринчи босқич учун гаровга олинганларнинг жорий мақоми рўйхати ҳали ҳам тақдим этилмаган. Шу муносабат билан Ғазо аҳолисининг сектор шимолига кўчишига рухсат бермаслик тўғрисида қарор қабул қилинди”, деди Исроил бош вазири девонхонаси маслаҳатчиси Дмитрий Генделман.
Таъкидланишича, ҳозирда Исроил томони АҚШ ва бошқа давлатлар воситачилигида Арбел Яҳудни озод қилиш масаласини ҳал қилиш учун “аҳамиятли саъй-ҳаракатларни” амалга оширмоқда.
“Биз барча гаровга олинганларни — тирикларни ҳам, ҳалок бўлганларни ҳам қайтаришга эришишга қатъий қарор қилдик”, дейилади хабарда.
ҲАМАС 200 нафар фаластинлик маҳбус эвазига 4 нафар исроиллик гаровга олинган аёлни озод қилди
Бир ҳафта олдин ҲАМАС Исроил билан келишувни амалга ошириш доирасида гаровга олинганларнинг иккинчи гуруҳини озод қилди. Тўрт нафар исроиллик ҳарбий қиз эвазига 200 нафар фаластинлик маҳбуслар, жумладан, терроризмда айбланиб, умрбод қамоқ жазосига ҳукм қилинганлар озод этилди.
Исроил армияси матбуот хизмати раҳбари Даниэль Хагари ҲАМАС фуқароларни гаровга олиш шартига риоя қилмаганини айтди.
”Биз Арбел Яҳудни, шунингдек, Шири Бибас ва унинг икки ёш фарзандини уйга қайтариш ниятидамиз”, деди у.
Шу билан бирга, Арбел Яҳудни озод қилиш масаласи ҳал қилинмагунча, Исроил тинч аҳолига Ғазо секторининг шимолига қайтишга рухсат бермайди, деди Нетаньяхунинг идораси.
Al Jazeera телеканалига кўра, ҲАМАС воситачиларга Арбел Яҳуд тирик экани ва 1 февраль куни Исроилга топширилиши ҳақида хабар берган. Яҳуд ҳарбий хизматчи бўлиб, Исроил армиясида тайёргарликдан ўтган.
Изоҳ (0)