Ostona afg‘on ayollari va qizlarini o‘qitish bo‘yicha ta’lim dasturini davom ettirishga tayyor. Bu haqda Qozog‘iston Tashqi ishlar vazirligi matbuot kotibi Aybek Smadiyarov brifingda ma’lum qildi.
“Afg‘oniston hukumati va ushbu dasturni moliyalashtirgan Yevropa Ittifoqi bilan kelishuvga erishildi. Yaqin kunlarda dastur qayta yo‘lga qo‘yiladi”, — dedi Smadiyarov. Ushbu o‘quv dasturi doirasida afg‘on ayollari uchun qancha grant ajratilganiga aniqlik kiritilmagan.
19—20-yanvar kunlari Bryusselda Markaziy Osiyo davlatlari va Yevropa Ittifoqining Afg‘oniston bo‘yicha maxsus vakillari uchrashuvi bo‘lib o‘tdi. Unda ishtirokchilar Afg‘onistonda mustahkam tinchlik va barqaror taraqqiyotni har tomonlama qo‘llab-quvvatlash maqsadini tasdiqlab, afg‘on ayol-qizlari huquqlarining yomonlashuvidan xavotir bildirgan.
Qozog‘iston Tashqi ishlar vazirligining maxsus topshiriqlar bo‘yicha elchisi Talgat Kaliyev Qozog‘iston afg‘on xalqiga yordam berish bo‘yicha o‘z majburiyatlariga sodiqligini ta’kidlagan va Qozog‘iston universitetlari afg‘on talabalari uchun ta’lim dasturida faol ishtirok etishda davom etishini bildirgan.
Dekabr oyida “Tolibon” yetakchiligidagi Afg‘oniston hukumati davlat va xususiy universitetlarda talaba qizlarning o‘qishini noma’lum muddatga to‘xtatib qo‘ygandi. Hokimiyatga kelganidan so‘ng “Tolibon” ayollar huquqlarini hurmat qilishga va’da bergan, biroq tez orada cheklovlar joriy qila boshlagan.
Ma’lumot uchun, 2019-yilda Yevropa Ittifoqi BMT Taraqqiyot dasturi bilan qoʻshma sinov loyihasi doirasida afgʻon qizlarini Oʻzbekiston va Qozogʻiston universitetlarida oʻqitish hamda Qirgʻiziston, Tojikiston va Turkmanistondagi maxsus taʼlim dasturlari uchun 2 million yevro ajratgan. “Tolibon” hukumatga kelganidan so‘ng, bu tashabbus to‘xtab qolgan.
Izoh (0)