“Tolibon” afg‘on talabalarining o‘quv mashg‘ulotlariga qaytishiga ruxsat berdi, deb yozadi Reuters. Afg‘oniston oliy ta’lim vaziri Abdulboqi Haqqoniy mamlakatdagi oliy ta’lim muassasalarini qayta ochishga ruxsat berilganini e’lon qilgan.
Uning aniqlik kiritishicha, iqlimi issiq bo‘lgan viloyatlarning talabalari 2022-yil 2-fevraldan, sovuq iqlimli viloyatlarda istiqomat qiluvchi talabalari esa 26-fevraldan o‘qishga qaytishi mumkin. Yangi semestr boshlanishidan oldin har bir OTMda imtihonlar bo‘lib o‘tadi.
Shu bilan birga, vazir qizlarning ham o‘quv mashg‘ulotlariga qaytish yoki qaytmasligi to‘g‘risidagi savolga javob berishni istamagan.
Afg‘on oliy ta’lim muassasalari va maktablarida o‘quv darslari 2021-yilning avgusti oxirida, mamlakatda hokimiyat tepasiga “Tolibon” kelganidan so‘ng to‘xtatilgandi. Sentabr o‘rtalarida esa boshlang‘ich maktablar o‘z ishini qayta boshlagan, biroq darslarga faqat o‘g‘il bolalar va erkak o‘qituvchilar kiritilgan. Ayrim xususiy universitetlar ham ochilgan, ammo ko‘plab holatlarda talabalar o‘qishga qayta olmagan.
“Tolibon” mamlakatda yana hokimiyat tepasiga kelgan avgust oyida harakat matbuot kotibi Zabihulla Mujohid ayollarga “islom qonunlari doirasida” ishlash, o‘qish va jamiyat boshqaruvida ishtirok etishga ruxsat berilishini aytgan edi. Shu bilan birga, toliblarning shartlariga ko‘ra, Afg‘onistonda ayollarning barchasi hijob (paranji) kiyishi kerak bo‘ladi. “Tolibon” avvalgi boshqaruvi davridan farqli ravishda bu safar ayollarning uydan yolg‘iz, erkaklar hamrohligisiz chiqa olishi mumkinligini kafolatlamoqda.
Keyinchalik Mujohid Afg‘onistondagi ishlaydigan ayollarni o‘z xavfsizligi uchun uydan chiqmaslikka chaqirgandi. “Bizning xavfsizlik kuchlarimizga ayollar bilan qanday munosabatda bo‘lish, ular bilan qanday muloqot qilish haqida o‘rgatilmagan. Mamlakatda to‘liq xavfsizlik o‘rnatilmaguncha ayollardan uyda qolishini so‘raymiz ”, — degan edi harakat vakili.
Izoh (0)