“ ‘Hizbulloh’ yo‘qotishlarga qaramay, Isroilga hujum qilishda davom etadi” — Hasan Nasrulloh

Livanning “Hizbulloh” harakati ehtimoliy oqibatlar va yo‘qotishlardan qat’i nazar, G‘azo sektoridagi falastinliklarni qo‘llab-quvvatlash maqsadida Isroilga zarba berishda davom etadi. Bu haqda harakat yetakchisi Hasan Nasrulloh “Al Manar” telekanali orqali efirga uzatilgan telemurojaatida ma’lum qilgan.

“Qurbonlar, oqibatlar va istiqbollar qanday bo‘lishidan qat’i nazar, G‘azoga qarshi boshlangan tajovuz to‘xtamaguncha Livan fronti ham to‘xtamaydi”, deya ta’kidladi u.

Hasan Nasrullohning so‘zlariga ko‘ra, so‘nggi paytlarda u rahbarlik qilayotgan tashkilotga rasmiy va norasmiy kanallar orqali “janubdan o‘t ochishni to‘xtatish” talabi bilan xabarlar kelgan. Biroq Nasrulloh “Hizbulloh bu tahdidlarga bo‘ysunmaydi va G‘azoni qo‘llab-quvvatlashda davom etadi”, deb aytdi.

So‘nggi ikki kun ichida Livanda aloqa vositalari — peyjer, ratsiya, telefon va boshqa shu kabi jihozlarning portlashi ro‘y berdi. 

Oqibatda jami 30 dan oshiq inson vafot etgani, 4000 nafardan ortiq kishi jarohatlangani xabar berildi. “Hizbulloh” bu ishni Isroil qilgani haqida dalillarga ega ekanini aytib, qasos olishini ma’lum qilgan.