Jizzax viloyati hokimiga ikki o‘rinbosar tayinlandi. Bu haqda viloyat hokimligi matbuot xizmati xabar berdi.
Zafar Azimov viloyat hokimining moliya-iqtisodiyot va kambag‘alikni qisqartirish masalalari bo‘yicha birinchi o‘rinbosari – viloyat Iqtisodiyot va moliya bosh boshqarmasi boshlig‘i lavozimiga tayinlandi.
Zafar Azimov 1985-yilda Samarqand viloyati, Samarqand shahrida tavallud topgan. U mazkur tayinlovga qadar kambag‘allikni qisqartirish va bandlik vazirining birinchi o‘rinbosari lavozimida faoliyat olib borayotgan edi.
Shuningdek, Zafar Ro‘ziyev viloyat hokimining qishloq va suv xo‘jaligi masalalari bo‘yicha o‘rinbosari – qishloq xo‘jaligi boshqarmasi boshlig‘i lavozimiga tayinlandi.
Zafar Ro‘ziyev 1964-yilda Qashqadaryo viloyati, Kitob tumanida tavallud topgan. U mazkur tayinlovga qadar 2019-yildan buyon Zarbdor tumani hokimi vazifasida ishlab kelayotgan edi.
Ma’lumot uchun, viloyat hokimining moliya-iqtisodiyot va kambag‘alikni qisqartirish masalalari bo‘yicha birinchi o‘rinbosari - viloyat Iqtisodiyot va moliya bosh boshqarmasi boshlig‘i lavozimida 2021-yildan bugungi kungacha Abduvalijon Mustanov hamda viloyat hokimining qishloq va suv xo‘jaligi masalalari bo‘yicha o‘rinbosari lavozimida 2019-yildan bugungi kungacha Oybek Ashurmatov ishlab kelayotgan edi.
19-dekabr kuni Ergash Soliyev boshqa ishga o‘tishi munosabati bilan Jizzax viloyati hokimi lavozimidan ozod etilgandi. Uning o‘rniga Ulug‘bek Mustafoyev Jizzax viloyati hokimi vazifasini bajaruvchi lavozimiga tayinlandi. Tayinlovga qadar u 2019-yil aprelidan buyon “Hududiy elektr tarmoqlari” aksiyadorlik jamiyati boshqaruvi raisi lavozimida ishlab kelgan.
Ulug‘bek Mustafoyev haqida
U 1968-yil Jizzax viloyatida tug‘ilgan. Toshkent xalq xo‘jaligi institutini bitirgan. “Sanoatqurilishbank”ning Jizzax viloyat filialida kichik, keyinchalik katta mutaxassis sifatida ishladi. Keyingi yillarda Markaziy bankning operatsion boshqaruvi katta iqtisodchisi va pul muomalasi bo‘limi boshlig‘i lavozimlarida ishlagan. Keyin 2016-yilgacha Markaziy bank raisining birinchi o‘rinbosari, 2016-yilda Jizzax viloyati hokimining birinchi o‘rinbosari, 2017-yilda “O‘zbekenergo” AJ boshqaruvi raisi lavozimiga tayinlangan.
Izoh (0)