O‘zbekistonda 2025-yilda darsliklar ijarasi uchun ota-onalardan to‘lov undirish rejalashtirilmagan. Bu haqda Iqtisodiyot va moliya vazirligi ma’lum qildi.
Vazirlik 2025-yilda maktablarda o‘quvchilar uchun darsliklar ijarasi bo‘yicha ijtimoiy tarmoqlarda tarqalgan xabarlar yuzasidan munosabat bildirdi.
Unda aytilishicha, 2025—2027-yillarga mo‘ljallangan Fiskal strategiya asosida ishlab chiqilgan byudjetnoma loyihasida 2025/2026-o‘quv yilidan 2—11-sinflarda bir to‘plam darslik va mashq daftarlari uchun ijara to‘lovi undirish tizimini joriy etish yuzasidan tegishli takliflar taqdim etilgan edi.
Byudjet jarayonlarini shakllantirishda vazirlik tomonidan, birinchi navbatda, iqtisodiy o‘sishning barqaror yuqori sur’atlari hamda iqtisodiy va ijtimoiy sohaning moliyaviy mutanosibligini ta’minlashda davlatning ijtimoiy majburiyatlarini to‘liq hamda o‘z vaqtida bajarishga ustuvor e’tibor qaratiladi. Bunda, samaradorlikni oshirish maqsadida turli yo‘nalishlar bo‘yicha tahlillar o‘tkaziladi.
2024-yilda maktab o‘quvchilari uchun 83,2 million nusxa darslik va mashq daftarlarini yetkazib berish uchun davlat budjetidan jami 1,5 trillion so‘m ajratilgan. Ushbu mablag‘lardan 435,5 milliard so‘mi (yoki 36 foizi) davriyligi 1 yil hisoblanadigan hamda har yili yangidan chop etiladigan mashq daftarlari uchun yo‘naltirilgan.
2025-yilda esa 81 million nusxa darsliklar va mashq daftarlari uchun jami 1,3 trln so‘m mablag‘ni to‘liq davlat byudjetidan qoplash ko‘zda tutilgan.
“Shu bilan birga, ijtimoiy tarmoqlardagi faol foydalanuvchilar tomonidan chop etilgan postlarda byudjet loyihasida Kitob jamg‘armasi xarajat va daromadlari ko‘rsatilmaganiga e’tibor qaratilgan. Qayd etish joizki, Kitob jamg‘armasi faoliyati to‘xtatilgan va yangi jamg‘arma tashkil qilinmagani sababli loyihada bu bo‘yicha ma’lumotlar aks ettirilmagan”, deyiladi bayonotda.
Vazirlik bayonotida ta’kidlanishicha, 2025-yil uchun davlat byudjeti doirasida ko‘zda tutilgan mablag‘lar yangi o‘quv yilida o‘quvchilarni darsliklar va mashq daftarlari bilan ta’minlash bo‘yicha ehtiyojni to‘liq qoplash imkonini beradi.
Bunda, ota-onalardan darsliklar va mashq daftarlari ijarasi uchun qo‘shimcha to‘lov undirish rejalashtirilmagan.
O‘zbekistonda 2022-yildan beri maktab darsliklari uchun ijara puli olinmayapti. O‘sha yilda maktab darsliklari va mashq daftarlarining ijara to‘lovlari miqdorlari keskin oshirilishi munosabati bilan keng jamoatchilik, ota-onalar tomonidan e’tirozlar bildirilgach, prezident sentyabr oyida maktab darsliklari va mashq daftarlarini bepul ijaraga berishni tezkor yo‘lga qo‘yish yuzasidan topshiriq bergandi.
Izoh (0)