Yakkaxon ijod qiladigan yagona o‘zbek ayol qiziqchisi Mahfuza Sherboyeva “Milliy” telekanalining “Osmondan tushgan yulduzlar” ko‘rsatuviga intervyu berdi. Qiziqchi intervyu davomida ijarada yashayotgan uyidan haydalgani va o‘z uyida ustachilik qilgani haqida gapirdi.
— Toshkent aeroportining yonida 12 qavatli dom bor, o‘sha yerda dugonam bilan ijarada yashardik. Uy egasi bo‘ldi uyni bo‘shatinglar, boshqa odam qo‘yaman, deganida uydan chiqib ketganmiz. Oyoq kiyimim uzilib ketgan, yelimlab, yirtiq oyoq kiyimda ko‘chada yurganman. Uydan chiqib ketgach, borar joyimiz yo‘q — ikkimiz ham bir og‘iz gapirmay aeroportning yo‘lidan ketaverganmiz. Oxiri dugonamning Toshkentda shuncha odamga uy bor, nahot bizga bo‘lmasa degan gapidan keyin rosa izlab-izlab, bir uy topganmiz. Har xil sinovli kunlar bo‘lgan, lekin barchasiga shukr qilaman, deydi qiziqchi.
— 2018-yilda bir xonali uy olganman. Usta olib keldim — unday qilamiz, bunday qilamiz, dedi va usta haqi 700 dollar bo‘lishini aytdi. Menda buncha pul yo‘q deb, o‘zim bozorga borib, savdolashib, uyga kerak barcha qurilish mollarini olib kelganman. Ustachilikdan xabari bor rus qo‘shnimdan yordam berishini so‘raganman — men uni mehmon qilardim, u esa yordam berardi. Lekin uyimning ko‘p qismini o‘zim ta’mirlaganman, deraza pardalarni ham o‘zim tikkanman, dedi Mahfuza Sherboyeva.
— Hozirgi yangi uyimda yolg‘iz yashayman, buni ham ta’mirlash ishlari tepasida boshidan oxirigacha o‘zim turganman. Shu uyimni olayotganimda sotuvchi bilan 10 million so‘mga kelisholmay qolganmiz — uy narxini 820 million so‘m deyishgan, mening qo‘limda 810 million so‘m bo‘lgan. Yo‘q, bu narxga sotmayman degan. Kechasi bilan agar shu uy xayrli bo‘lsa menga nasib qil, deya Xudodan so‘rab chiqqanman. Ertasiga ertalab o‘sha inson qo‘ng‘iroq qilib, men aytgan narxga rozi bo‘lgan. Yolg‘iz yashaysiz, bir o‘zingiz zerikmaysizmi deb ko‘p so‘rashadi. Yo‘q, qaytaga maza qilaman — kitob o‘qiyman, YouTube’dan qiziqchi ustoz san’atkorlarning videolarini va san’atkorlarning intervyularini tomosha qilaman, deydi ijodkor.
— Pul yig‘ishga mahkamman, behudaga pul sarflamayman. Bir tanishim yaxshi joydan yer olib to‘yxona qurdiring, kuniga besh milliondan tushsa ham bir oyda 150 million bo‘ladi, deya shu biznes bilan shug‘ullanish taklifini berib qoldi. Ha, avvaliga beva-bechora va yetimlarga ehson qilib dasturxon yozaman-da, keyin biznesni boshlayveraman, deya o‘ylab qoldim, dedi qiziqchi.
Qachon turmushga chiqasiz degan savolga, nasib qilganida deya kulib javob berdi Mahfuza Sherboyeva.
Izoh (1)
Мен хам нечи йилдан бери кизим БН ижарада яшаб келаман Хар куни эрталаб кузимни очганимдан оллохга шкур уйдан чикигла сотаман йоки пулини вахтида беролмайопсанла деган гапни айтмади деб худога шукуронала келтираман Хар Бир куним куркув БН утади чик деса кизим БН кайерга бораман деб тукиз юз минг ойлик БН Уй ололмаслигимни билса хам лекин кизим БН умудимизни узмаймиз опажон оллохим сизга куч куват соглиг берсин илохим уйларизга туйлар килиш насиб айласин менга хам Уй олиш насиб айласин бухородан мухлисис нигора