Butun dunyo Anant Ambani va Radhika Merchantning to‘yini bir necha oy davom etgan qiziqarli teleserial kabi tomosha qildi. Ammo to‘ylarni dabdaba bilan o‘tkazish hindlarga xos odatiy hol. Quyida Hindiston tarixidagi eng qimmatbaho va hashamatli 10 ta to‘y marosimlaridan qiziqarli ma’lumotlar bilan tanishamiz.
Ranvir Singh va Dipika Padukone: 12 million dollar
Olti yil davom etgan munosabatlardan so‘ng 2018-yilda Bollivud juftligi Ranvir Singh va Dipika Padukone go‘zal tabiat qo‘ynida — Italiyadagi Komo ko‘li yaqinida to‘y marosimini o‘tkazdi. Juftlik ikki xil an’anada bayram uyushtirdi: konkani milliy an’anasiga xos marosim d’Esteda villasida, sindhi an’analaridagi ikkinchi marosim esa Rokkabruna mehmonxonasida o‘tkazildi.
So‘ng kelin-kuyov Hindistonga qaytib keldi va Dipika Padukonening ona shahri Bangalorda va Mumbay shahrida marosimlar davom etdi.
Adel Sajan va Sana Xon: 15 million dollar
2017-yilning aprel oyida tadbirkor Adel Sajan va aktrisa Sana Xon turmush qurishdi. To‘y marosimi Barselonadan Italiyaga ketayotgan Costa Fascinosa kemasida bo‘lib o‘tdi. Mehmonlar bir necha kunga Fransiyada ham to‘xtab qoldi.
Kelin-kuyov mehmonlarga Harrods brendidan eksklyuziv sovg‘alarni taqdim etdi. Tadbir 10 qavatli hashamatli tortni kesish marosimi bilan yakunlandi.
Virat Kohli va Anushka Sharma: 15 million dollar
2017-yil dekabr oyida Hindistonning kriket jamoasining sobiq kapitani Virat Kohli va Bollivud aktrisasi Anushka Sharma Italiyaning Komo ko‘lida turmush qurdi. To‘y marosimi hindu an’analariga amal qilgan holda o‘tkazildi.
So‘ng er-xotin Mumbayda taniqli shaxslar va sportchilar yig‘ilgan hashamatli restoranda ziyofat uyushtirdi. Keyin bayram Dehlida davom etdi. To‘yga hurmatli mehmonlardan Hindiston bosh vaziri Narendra Modi tashrif buyurdi.
Sonam Vasvani va Navin Fabiani: 30 million dollar
2017-yilda yirik Stallion Group konglomerati asoschisi, magnat Sunil Vasvanining qizi Sonam Vasvani nufuzli tadbirkor Kamol Fabianining o‘g‘li Navin Fabiani bilan turmush qurdi. Bayramning birinchi kuni hashamatli Ferstel saroyida, ikkinchi qismi esa me’moriy go‘zalligi va tarixiy ahamiyati bilan mashhur bo‘lgan Belveder saroyida bo‘lib o‘tdi. To‘yga taklif etilgan Gollivudning mashhur qo‘shiqchisi Bruno Mars ushbu kunda barcha uchun unutilmas taassurotlar qoldirdi.
Vanisha Mittal va Amit Bhatiya: 66 million dollar
Po‘lat quyish zavodlari giganti Lakshmi Mittalning qizi Vanisha 2004-yilda londonlik bankir Amit Bhatiga turmushga chiqdi. Parijda bo‘lib o‘tgan to‘y marosimi olti kun davom etdi. Bayram dasturi doirasida xonanda Kayli Minoug, Bollivud yulduzlari Shohrux Xon va Ayshvariya Ray kabi yulduzlarning chiqishlari bo‘lib o‘tdi. Asosiy to‘y marosimi 17-asrda qurilgan Vo-le-Vikont qasrida bo‘lib o‘tdi. Saroy bog‘larida hind an’anaviy marosimi — mandapani o‘tkazish uchun mumbaylik 35 dan ortiq gulchilar va dekoratsiya mutaxassislari jalb qilindi.
Shristi Mittal va Gulraj Bel: 70 million dollar
2013-yilda po‘lat quyish zavodlari magnati Pramod Mittalning qizi Shristi Mittal bankir Gulraj Belga turmushga chiqdi. To‘y Barselonada uch kun davom etdi. Tadbirga besh yuzga yaqin mehmonlar taklif qilindi va dasturxonga eng sara taomlar tortildi, jumladan, ispaniyalik mashhur oshpaz Serji Arola mehmonlar uchun 60 kg og‘irlikdagi olti qavatli bayram tortini taqdim etdi. To‘y marosimi unutilmas bo‘lishi va fotosuratchilar bayramni har tomonlama tasvirga olishi uchun vertolyotlar ijaraga olindi.
Brahmani va Rajiv: 74 million dollar
2016-yilda siyosatchi, ilgari noqonuniy konchilik faoliyati uchun hibsga olingan Janardxan Reddi qizi Brahmanining to‘yini keng miqyosda nishonladi. Marosimlar besh kun davom etdi va Bangalor saroyida bo‘lib o‘tdi. Tadbirga 50 000 dan ortiq mehmonlar taklif qilindi va bayram o‘sha davrning eng yirik to‘y marosimlaridan biriga aylandi.
Sushanto va Simanto Royning qo‘shaloq to‘yi: 75 million dollar
2004-yilda taniqli biznes-magnat Subrata Roy ikkala o‘g‘lini bir kunda uylantirdi va katta qo‘shaloq bayram o‘tkazdi. Tadbir Lakhnaudagi Sahara stadionida bo‘lib o‘tdi va bir hafta davom etdi. Unga 11 mingdan ortiq mehmon, jumladan, Bollivud yulduzlari va mashhur sportchilar tashrif buyurdi. Dunyoning turli burchaklaridan kelgan mehmonlarga qulaylik yaratish maqsadida xususiy aviaqatnovlar tashkil etildi.
Isha Ambani va Anand Piramal: 100 million dollar
2018-yilda taniqli milliarder Mukesh Ambanining qizi Isha Ambani Anand Piramal bilan turmush qurdi. To‘y marosimi bir hafta davom etdi va butun dunyo bo‘ylab bir nechta joylarni qamrab oldi. Bayram tadbirlari Udaypurda, Italiyaning mashhur Komo ko‘lida va Mumbay shahrida bo‘lib o‘tdi. Asosiy marosim Hindistondagi Pichola ko‘li yaqinidagi xususiy orolda bo‘lib o‘tdi.
Anant Ambani va Radhika Merchant: 150 million dollardan ortiq
Anant Ambani va Radhika Merchantning to‘yi haqiqatan ham butun dunyo e’tiborini tortdi. Iyul oyida o‘tkazilgan eng yirik marosimning o‘zi uch kun davom etdi. Milliarderlar oilasi barcha tadbirlar va sovg‘a-salomlarga qancha mablag‘ sarflagani rasman oshkor etilmaganiga qaramay, mutaxassislarning fikricha, xarajatlar 150 million dollardan ortiq bo‘lgan. To‘yga tashrif buyurgan yulduzlarning gonorarlari ham juda yuqori. Mish-mishlarga ko‘ra xonanda Riannaga 7 million dollar, Jastin Biberga esa 10 million dollar haq to‘langan.
Izoh (0)