Gollivudning 1990-yillardagi mashhur aktrisasi Demi Mur ikkinchi qizi dunyoga kelgach, qomatini tiklash uchun sa’y-harakatlari va ketkazgan vaqti haqida so‘zlab berdi. Go‘zal ko‘rinishga qisqa muddatda qaytish uchun aktrisa o‘z sog‘lig‘ini xavf ostiga qo‘ygan va organizmini murakkab mashqlar bilan charchatgan.
1991-yilda Demi Murning qizi Skaut Uillis dunyoga kelgandan atigi olti oy o‘tib aktrisa suratga olish maydoniga qaytdi. U ishga velosipedda borishga qaror qildi va har kuni qariyb 96 kilometr masofani bosib o‘tdi.
“Men qizimga kechasi bilan qarab chiqar, parvarishlar edim. So‘ng erta tong bo‘lmasidan avval qorong‘ida o‘rnimdan turib, murabbiyim bilan Paramount’gacha velosipedda borar edim. “Nomaqbul taklif” filmini suratga olish maydonida deyarli yarim kun ishlar edim va 12 soatlik mehnatdan keyin uyimga — qizim oldiga qaytar edim”, dedi Mur CBS Sunday Morning telekanaliga bergan intervyusida.
Foto: Filmaffinity
Hozirda aktrisa o‘zining bunday qilganidan pushaymon va o‘sha davrlar tashqi ko‘rinishi va qaddi-qomatiga ko‘p e’tibor berganidan afsusda:
“Tug‘ruqdan avvalgi holatimga qaytish uchun o‘zimga haddan ortiq bosim o‘tkazganman”, deydi aktrisa.
Foto: ELLE
Amerikalik aktrisa, model va qo‘shiqlar muallifi Demir Mur 1962-yilda Nyu Meksiko shtatining Rozuell shahrida tug‘ilgan. Gollivud yulduzi filmografiyasida o‘ttiz yildan ko‘proq vaqt davomida eng muvaffaqiyatli film — rejissyor Jerri Sukerning “Arvoh” melodramasi bo‘ldi. Demi Mur ishtirokidagi 1990-yilda namoyish etilgan kartina eng yuqori daromad keltirgan filmga aylandi. Film besh marotaba “Oskar” mukofotiga, Mur esa ”Oltin globus”ga nomzod bo‘lgan.
Izoh (0)