Foto: Mashhurlikda ota-onasidan o‘ta olmagan yulduzlar

Mashhurlarning farzandlari ikki toifaga bo‘linishi mumkin. Biri kasb borasida ota-onasining izidan borishni abzal biladiganlar, ikkinchisi esa karyera qilish uchun boshqa bir sohani tanlaydiganlar. Kasb tanlashda ota-onasidan namuna olgan, ammo ulardek muvaffaqiyatga erisha olmagan yulduzlar haqida ma’lumot berib o‘tamiz.

Enrike Iglesias

Debyut albomi 6 million, keyin esa 23 million nusxada sotilgan, albomidagi qo‘shiqlar ham chartda yuqori o‘rinlarni qayd etgan. Bu natijalar otasi qo‘lga kiritgan natijalar oldida hech narsa emas. 77 yashar xonanda 300 million nusxada sitilgan plastinkalari va Ginnesning rekordlari kitobidan o‘rin olgani bilan maqtanishi mumkin. Shuningdek, 80 dan ortiq albomni Xulio 14 xil tilda yozgan.

Kolin Xenks

Tom Xenksning o‘g‘li “Dekster”, “Fargo” singari filmlarda rol o‘ynaganiga qaramay, otasidek mashhurlikka erishishiga hali bor. Tom 39 yoshida “Filadelfiya” filmidagi roli uchun “Oskar” mukofotiga loyiq deb topilgan. Keyingi yili “Forrest Gamp” filmida suratga tushgani unga yana bir “Oskar” olib kelgan. Shundan keyin 4 marta “Oskar”ga, shuningdek, 8 marta “Oltin Globus”ga laureat bo‘lgan va 4 marotaba ushbu mukofotni qo‘lga kiritishga muvaffaq bo‘lgan. Bu hali hammasi emas. Gollivud yulduzining 13 marotaba Emmi mukofotiga nomzodi qo‘yilgan va ularning oltitasida g‘oliblikni qo‘lga kiritgan.

Eva Amurri

Syuzan Sarandonning 35 yoshli qizi karyerasini ham onasinikichalik muvaffaqiyatli deb bo‘lmaydi. Bir qancha taniqli loyihalar, xususan, “Doktor Xaus”da suratga tushganiga qaramay, yetarlicha shon-shuhratga erishmagan. Aktrisalikdan tashqari, suratga tushgani va blog yuritgani ham unga yordam bera olmagan. Onasida esa istalgan amerikalik aktrisa havas qilishi mumkin bo‘lgan natija bor. U to‘rt marta “Oskar” mukofotiga nomzod bo‘lishga va bir marotaba mukofotni qo‘lga kiritishga ulgurgan.

Rumer Uillis

32 yashar aktrisa o‘nlab filmlarda rol ijro qilganiga qaramay, arsenalida maqtanishga arzigulik rol deyarli yo‘q. Undan farqli o‘laroq, ota-onasi Demi Mur va Bryus Uillis mashhurlik bobida yetakchi bo‘lgan va ajrashganiga ham qaramay, tabloidlar sobiq juftlikning shaxsiy hayoti haqida yozishdan to‘xtamaydi. Uch farzandning kattasi bo‘lgan Rumer, 2015-yilda “Yulduzlar bilan raqs” teleshouda ishtirok etganidagina tanilgan. Uning ikki singlisi esa kasb borasida ota-onasining izidan ketishni istamagan.

Yakob Dilan

Yakob bergan intervyularidan birida jurnalistlar suhbat chog‘i uning o‘zidan ko‘ra otasi haqida ko‘proq savol berishini ma’lum qilgan. Nobel mukofotiga sazovor bo‘lgan Bob o‘g‘li uchun namuna bo‘lgan. Kichik Dilan The Wallflowers guruhining a’zosi bo‘lgan vaqti 1996-yilda albom to‘rt million nusxada sotilganiga qaramay, shundan keyin pichoqqa ilinadigan natija qayd etmagan.

Kelli Osborn

Kelli va uning otasi Black Sabbat guruhi solistining yutuqlarini solishtirish unchalik to‘g‘ri bo‘lmaydi. Aslida Kellining tanilishiga ham otasi sababchi bo‘lgan. U MTV kanalida “Osbornlar oilasi” shousida ishtirok etgan. Shundan keyin ikki marta albom chiqargan, kinoda suratga tushgan, ammo bularning bari besamar ketgan.

Memi Gammer

Meril Stripning qizi bo‘lishning o‘ziga yarasha yutuqlari va abzalliklari bor. Uydan chiqmasdan turib aktyorlik mahoratiga ega bo‘lish ijobiy tomoni hisoblansa, karyera borasida 19 marta “Oskar”ga nomzod bo‘lgan aktrisa bilan solishtirish va taqqoslanish salbiy tomoni hisoblanadi. Hamisha faol ekani, “Yaxshi ayol”, “Haqiqiy izquvar” va shunga o‘xshash mashhur seriallarda epizodik rollar ijro qilganiga qaramay, uning qo‘lga kiritgan natijalari bilan onasiniki o‘rtasida yer bilan osmoncha farq bor.

Shon Lennon

Jon Lenonning o‘g‘li intervyularidan birida, nima qilishidan qat’i nazar, ijtimoiy tarmoq foydalanuvchilari uni otasi bilan taqqoslashi va o‘zi haqida noto‘g‘ri xulosaga kelishidan noligan. Aslida Shon ham ijod qilishdan tinadiganlardan emas. U prodyuserlik, musiqa yozish bilan shug‘ullanish bilan birga, ekofaol ham hisoblanadi. Ammo shunda ham muxlislar unda otasini ko‘rishga urinadi va unday bo‘lib chiqmasa, hafsalasi pir bo‘ladi.

Patrik Shvarsenegger

Patrik ham mashhurlik borasida otasining soyasida qolganlardan. “Temir Arni”ning 27 yashar o‘g‘li ham o‘zini ijodda sinab ko‘rganiga qaramay, yetarlicha muvaffaqiyatga erishmagan. Sariq matbuotdan uning nomi tushmasligiga ham nimagadir erishgani emas, Gollivudni zabt etgan Shvarseneggerning o‘g‘li ekani sabab.