“Qora qor”, “Sug‘ur kuni”, “Ertadan keyin”: qahraton qish haqidagi filmlar

Kuni kecha birinchi qor ham yog‘di, yaqindagina to‘kilgan kuzgi barglar qirov bilan qoplandi, bu esa Yangi yil yaqinlashayotganini anglatadi. Qahraton qishni sog‘inganlar uchun eng “sovuq” filmlarni taqdim etamiz.

“Sug‘ur kuni”

Syujet markazida Sug‘ur kuni sharafiga har yili o‘tkaziladigan festivalni yoritish uchun to‘rtinchi marta yo‘lga chiqqan va vaqt zanjiriga tushib qolgan ob-havo boshlovchisi Fil (Bill Myurrey) turadi. Qahramon yana va yana o‘sha zerikarli, hech narsaga arzimaydigan kunni boshdan kechirishi kerak. Nevrolog va psixiatr ham Filga yordam bera olmaydi va shunda u vaziyatdan foydalanib, ilgari jur’ati yetmagan harakatlarni amalga oshirishga qaror qiladi. 

Rejissyor Xarold Remisning mazkur filmi Denni Rubinning hikoyasi asosida suratga olingan bo‘lib, u o‘z navbatida Uilyam Din Xauellsning “Har kuni Rojdestvo har kuni” asaridan ilhomlangan. Film Bill Myurreyning aktyorlik uslubiga xos kinoya va abadiy hayot masalalari bo‘ladimi yoki sarkazm bilan parallel bo‘ladimi, juda murakkab falsafiy mavzularni komediya sifatida taqdim etishi tufayli kult filmga aylandi.

“Beg‘ubor aqlning abadiy quyoshi”

Mishel Gondrining ajoyib romantik filmida xotiralar inson shaxsining asosi sifatida muhokama qilinadi. Tartibsiz hikoya, qishki plyajlar va muz bilan qoplangan daryolar ishqibozlari uchun ideal film. Filmda Jim Kerri va Keyt Uinslet o‘z ampluasiga mutlaqo xos bo‘lmagan qahramonlarni o‘ynagan. Uinslet Klementina roli uchun “Oskar”, “Oltin globus” va Britaniya kino akademiyasi mukofotiga nomzod bo‘lgan.

Avliyo Valentin kunida zerikarli va oddiy hayot kechiradigan g‘amgin va sokin Joel o‘z-o‘zidan ishni tashlab, Montokka borishga qaror qiladi. Sovuq qish kunida u sho‘x-shaddod Klementinaga duch keladi, u darhol yigitni o‘ziga maftun qiladi. Tez orada ma’lum bo‘ladiki, qahramonlar nafaqat bir-birlarini bilishadi, balki bir necha yil birga yashagan ham. Ammo keyinchalik Klementina Joelni xotirasidan o‘chirish uchun shubhali “Lakuna” tashkilotiga murojaat qilishga qaror qilgan.

“Qora qor”

Yakutiyalik rejissyor Stepan Burnashev tomonidan suratga olingan ekstremal sharoitlarda omon qolish haqidagi qayg‘uli triller. Burnashev “Qora qor” filmini o‘z ssenariysi bo‘yicha suratga olgan, shuningdek, filmga o‘zi prodyuserlik qilgan. Film Yevropaga kinofestivalida bosh sovrinni qo‘lga kiritgan.

“Qora qor” real voqealarga asoslangan. Yo‘l ishchisi Gosha uzoq Yakutiya qishloqlarida qalbaki spirtli ichimliklar sotishdan daromad oladi. Mahalliy aholi tobora qaramlik girdobiga botib bormoqda, ko‘pchilik oxirgi narsasini ham shishaga almashtirishga tayyor. Bunday biznes Goshani bezovta qilmaydi. Bir kuni navbatdagi reys vaqtida yuk mashinasi bepoyon muz sahrosi o‘rtasida qolib ketadi. Bundan tashqari, Goshaning o‘ng qo‘li jarohatlanadi. Qahramon qahraton qishining avjida qor va o‘zi bilan yolg‘iz qoladi.

“Ertadan keyin”

Insoniyat yillar davomida ekologik muammolarga ko‘z yumib keladi, ozon qatlamini yo‘q qiladi va tabiiy muvozanatni buzadi. Paleoklimatolog Jek Xoll (Dennis Kuayd) BMTning Dehlidagi konferensiyasida siyosatchilarni yaqinlashib kelayotgan iqlim inqirozi haqida ogohlantirishga urinadi, ammo uni aqldan ozgan deb hisoblashadi va olimning dalillarini jiddiy qabul qilishmaydi. Falokat Jek bashorat qilganidan ancha oldin boshlanadi: iqlim o‘zgarishi hammaning ko‘z o‘ngida sodir bo‘la boshlaydi — sayyoraga yangi muzlik davri yaqinlashmoqda. Bu orada Jekning o‘g‘li Sem (Jeyk Jillenxol) do‘stlari bilan Nyu Yorkda qolib ketadi, shaharni misli ko‘rilmagan qor bo‘roni qoplaydi. Jek Nyu Yorkka yetib borish va o‘g‘lini qutqarish uchun hamma narsaga tayyor.

Film Art Bell va Uitli Striberning “Kelajakdagi global bo‘ron” ilmiy-fantastik kitobiga asoslangan. Filmga Roland Emmerix rejissyorlik qilgan, u kino tarixiga “Oy qulashi”, “Mustaqillik kuni” va “2012-yil” kabi yirik halokatli filmlar ijodkori sifatida kirgan.

“Porlash”

Jek Torrens (Jek Nikolson) “Overluk” mehmonxonasiga nazoratchi bo‘lib ishga joylashadi. Mehmonxona qoyali tog‘larning baland qismidagi xushmanzara joyda joylashgan, lekin qishda unga boradigan yo‘lni qor qoplaydi, shuning uchun u bahor kelguncha yopiladi. Jek uchun bu mukammal ish, chunki u o‘z kitobini yozib tugatishga va nihoyat, oilasining moddiy ahvolini yaxshilashga umid qilmoqda. Uning oilasi — xotini Vendi (Shelli Dyuvall) va o‘g‘li Denni qishlash uchun u bilan birga ketishadi, ular uchovlari bir necha oy tashqi dunyodan izolyatsiyada bo‘lishlari kerak. Mehmonxona boshqaruvchisi bu oson bo‘lmasligini aytadi, chunki avvalgi nazoratchi aqldan ozgan va butun oilasini o‘ldirgan. Jek bilan Vendi uning so‘zlariga jiddiy munosabatda bo‘lishmaydi, biroq tez orada Denni o‘zini g‘alati tutayotganini payqab qolishadi va mehmonxonada yolg‘iz emasliklarini gumon qilishadi.

Mazkur film “Yomon rejissyor” va “Yomon aktrisa” nominatsiyalarida “Oltin malina” antipremiyasiga nomzod bo‘lgan Stenli Kubrikning yagona filmi hisoblanadi. Hatto Stiven Kingga ham asarning ekranlashtirilishi yoqmaydi, chunki u asl nusxadan katta farq qiladi. Shunga qaramay, vaqt o‘tishi bilan filmga bo‘lgan munosabat o‘zgardi va bugungi kunda u barcha davrlarning eng buyuk horrorlari ro‘yxatida turadi.

“Omon qolgan”

Alexandro Gonsalesning Inyarritu rejissyorlik qilgan mazkur film uchun operator Emmanuel Lyubetski “Oskar” mukofotiga sazovor bo‘lgan. Bosh rolni ijro etgan Leonardo Di Kaprio ham o‘zining birinchi “Oskar”ini aynan shu film tufayli qo‘lga kiritgan. Buning uchun u ot jasadining ichiga kirgan, xom jigar yegan, muzdek daryoda suzishdan va suratga olish maydonchasida doimiy ravishda sovqotishdan keyin son-sanoqsiz shamollashlarga duchor bo‘lgan.

XIX asr, Amerikaning shimoli-g‘arbiy qismi. Trapper Xyu Glassga (Di Kaprio) grizzli ayig‘i hujum qiladi va unga og‘ir jarohatlar yetkazadi. Yaqindagina hujumdan omon qolgan va arikara hindulari tomonidan vayron qilingan Glass otryadi qo‘lga kiritilgan teri qoldiqlari bilan eng yaqin qal’aga boradi. Guruh a’zolari yarador Glassni o‘zlari bilan olib ketishga qaror qilishadi, ammo ulardan biri Jon S. Fitsjerald (Tom Xardi) bunga rozi bo‘lmaydi, chunki bunday yuk butun otryadni sekinlashtiradi. Fitsjeraldga u o‘lmaguncha Glass bilan birga bo‘lish va munosib ravishda dafn etish topshiriladi, ammo Jon yarador ovchi tezroq o‘lishi uchun uni yolg‘iz qoldiradi. Ammo Glass o‘lmoqchi emas, u qal’aga yetib olish va sotqindan qasos olish uchun qishki o‘rmon bo‘ylab yuzlab kilometr yo‘lni yolg‘iz bosib o‘tishi kerak.

“Kichik ayollar”

Yaqinda o‘zining yangi “Barbi” xiti bilan kino sanoatini hayratga solgan Greta Gervigning samimiy va hayotbaxsh filmi. “Kichik ayollar” Luiza Mey Olkottning xuddi shu nomdagi avtobiografik romaniga moslashtirilgan bo‘lib, unda balog‘atga yetish va ayollar ozodligi mavzulari ko‘tariladi.

Film voqealari Amerikada fuqarolar urushi avj olgan paytda sodir bo‘ladi. Oila boshlig‘i March konfederatlarga qarshi urushga ketgan, uning rafiqasi Marmi (Lora Dyorn) va to‘rt qizi esa qiynalib yashashadi. Shunga qaramay, oila tushkunlikka tushmaydi — kambag‘al qo‘shnilarga yordam beradi, Rojdestvo bayrami va quvnoq tomoshalar uyushtiradi. Qizlarning har biri umid bilan yashaydi: Jo (Sirsha Ronan) romanlar yozishni orzu qiladi, Emi (Florens Pyu) Parijga ko‘chib borib, rassom bo‘lishni istaydi, Meg (Emma Uotson) turmush qurishga tayyorgarlik ko‘radi, pianinochi Eliza (Elayza Skanlen) esa shunchaki urushning tugashi va oilasi doimo birga bo‘lishini xohlaydi.