O‘zbekiston, Qozog‘iston va Ozarbayjon Respublikalari o‘rtasida “Yashil yo‘lak” loyihasi doirasida ta’sis shartnomasi imzolandi, deb xabar bermoqda Energetika vazirligi matbuot xizmati.
Shartnoma 27-dekabr kuni mamlakatlarning tizim operatorlari (O‘zbekistondan — “O‘zbekiston milliy tarmoqlari” AJ, Qozog‘istondan — “KEGOC” AJ, Ozarbayjondan — Azerenerji OAJ) tomonidan imzolandi.
O‘zbekiston, Qozog‘iston va Ozarbayjon davlat rahbarlari tomonidan 2024-yil 13-noyabr kuni imzolangan O‘zbekiston, Qozog‘iston va Ozarbayjon Respublikalari o‘rtasida “yashil” energiya ishlab chiqarish va uzatish” loyihasi bo‘yicha bitimni amalga oshirish maqsad qilingan.
-yqT0oPoc.jpg)
Xabarda ta’kidlanishicha, “Yashil yo‘lak” deb ham ataladigan ushbu loyihaning amalga oshirilishi Yevropa ittifoqining “Yashil bitim” kabi yangi tashabbuslarini hisobga olgan holda savdo imkoniyatlarini oshiradi. Ushbu loyiha energetika tizimlari barqarorligini mustahkamlashga yordam beradi, shuningdek, “yashil” investitsiyalar orqali issiqxona gazlari chiqindilarini kamaytirish bo‘yicha ekologik maqsadlarga katta hissa qo‘shadi.
Tomonlar Ozarbayjonning Boku shahrida loyihani amalga oshirish bo‘yicha qo‘shma korxona tashkil etish taklifini qabul qildi. Xususan, CESI kompaniyasi loyihaning texnik-iqtisodiy asoslarini tayyorlash uchun konsalting kompaniyasi sifatida ishtirok etadi.
2023-yilning noyabrida Bokuda elektr energiyasini ishlab chiqarish va eksport qilish masalalari bo‘yicha O‘zbekiston, Ozarbayjon va Qozog‘iston vazirlari uch tomonlama uchrashuvi bo‘lib o‘tgandi. Unda tomonlar Ozarbayjon orqali Markaziy Osiyo davlatlaridan Yevropaga elektr energiyasini eksport qilish imkoniyatlarini ko‘rib chiqqan. O‘zbekiston, Ozarbayjon, Qozog‘iston Yevropaga “yashil” energiya eksport qilish bo‘yicha texnik shartlarni tayyorlashga, shuningdek, loyihani amalga oshirish uchun qo‘shma korxona yaratish istiqbollarini o‘rganishga kelishilgandi.
2024-yilning avgustida Shavkat Mirziyoyev va Ilhom Aliyev “yashil” energiya ishlab chiqarish va uni Ozarbayjon orqali Yevropa mamlakatlariga eksport qilish bo‘yicha keng ko‘lamli mintaqaviy loyihani amalga oshirishni tezlashtirishga kelishdi.
2024-yil noyabr oyida O‘zbekiston, Ozarbayjon va Qozog‘iston rahbarlari “yashil” energiyani rivojlantirish va uzatish loyihasiga start berdi. Tadbirda so‘zga chiqqan Shavkat Mirziyoyev qayta tiklanuvchi energiya iqtisodiy maqsad emas, balki kelajakka qo‘shilayotgan hissa, kelgusi avlodlar oldidagi masʼuliyat tuyg‘usining natijasi ekanligini taʼkidladi.
Energetika vazirligi rahbari Jo‘rabek Mirzamahmudov Kaspiy dengizi tubi bo‘ylab elektr kabelini o‘tkazish bo‘yicha Qozog‘iston—O‘zbekiston—Ozarbayjon qo‘shma uch tomonlama loyihasi muvaffaqiyatli amalga oshirilsa, O‘zbekiston 2030-yildan boshlab ortiqcha elektr energiyasini Yevropaga eksport qila olishini aytgandi.
Izoh (0)