O‘zbekistonda “yashil energiya” uchun aholiga 8,9 mlrd so‘m subsidiya berildi

O‘zbekistonda 2024-yilning 9 oyida 6 ming nafardan ortiq fuqaroga 8,9 milliard so‘mlik subsidiya hisoblandi. Bu haqda Soliq qo‘mitasi xabar berdi.

2023-yil 1-apreldan “Quyoshli xonadon” dasturi doirasida xonadoniga quyosh panellarini o‘rnatgan jismoniy shaxslarga quyosh paneli orqali ishlab chiqarilgan va yagona elektr energetika tizimiga uzatilgan elektr energiyasining har bir kilovatt soati uchun 1000 so‘mdan subsidiya ajratilishi belgilangan.

2024-yilning yanvar—sentyabr oylarida 6 ming nafardan ortiq jismoniy shaxs ushbu dasturdan foydalanib, elektr tarmoqlariga o‘tkazilgan quyosh energiyasi uchun 8,9 milliard so‘m (8,9 million kVt/soat) davlat byudjetidan subsidiya olgan.

Subsidiyaning eng katta qismi quyidagi hududlarga to‘g‘ri kelmoqda:

• Xorazm viloyati — 2,1 millird so‘m;
• Qoraqalpog‘iston Respublikasi — 1,5 milliard so‘m;
• Toshkent shahri — 1,2 milliard so‘m.

Subsidiyani “Soliq” mobil ilovasining “Keshbek” bo‘limidagi “Kartaga pul o‘tkazish” oynasi orqali bank kartasiga o‘tkazib olish mumkin.