Toshkent shahrining Yangihayot tumanida yashash uchun yaroqsiz bo‘lgan 409 ta ikki qavatli yog‘och uylardan iborat “Yo‘ldosh” (ilgari “Sputnik” massivi deb nomlangan) mavzesini yangilash ishlari boshlandi. Bu haqda poytaxt hokimligi huzuridagi Tashkent Invest kompaniyasi matbuot xizmati xabar berdi.
Ma’lum qilinishicha, ushbu uylar aholisi uchun “Gulshanobod” mahallasida “Yangi mahalla” turar-joy majmuasi barpo etiladi. Loyiha GC-Group Industries MChJ tomonidan 2024—2027-yillar davomida 24 gektar maydonni qamrab olgan hududda amalga oshiriladi.
Majmua hududida 13 392 ta xonadonga mo‘ljallangan 93 ta 16 qavatli zamonaviy uy quriladi. Infratuzilmaga 1600 o‘quvchiga mo‘ljallangan maktab, 600 o‘rinli bolalar bog‘chasi va sun’iy ko‘l kiradi. Uylarning birinchi qavatlari yashash uchun mo‘ljallanmagan bo‘lib, maishiy xizmat ko‘rsatish zonalari hamda yerusti va yerosti avtoturargohlar joylashtiriladi.
Qayd etilishicha, hozirda shartnomalar tuzish bo‘yicha ishlar olib borilmoqda.
“Yo‘ldosh” mavzesi haqida
“Yo‘ldosh” mavzesi hududida aholi 1966-yilning yozida yashay boshlagan. Shaharliklar uchun uy-joy masalasining vaqtinchalik yechimi sifatida to‘rt yuzdan ortiq ikki qavatli yog‘och uylar qurilgan.
Tashkent Invest kompaniyasi xabarida qayd etilishicha, hozirgi paytda bunday uy-joylar ma’nan eskirgan va xonadonlarning kichik maydoni (har bir kishiga 16 kvadrat metrdan kam) hamda oddiy maishiy sharoitlarning yo‘qligi sababli sifatli uy-joyga qo‘yiladigan zamonaviy talablarga javob bermaydi.
Aksariyat uylarning yog‘och qurilish konstruksiyalari va muhandislik tarmoqlari yuqori darajada jismoniy eskirgan, shuningdek, energiya tejamkor emas va yong‘in xavfi yuqori.
“Bunday uylarda yashash shaharliklar uchun noqulay va hatto xavflidir”, deyiladi kompaniya xabarida
“Yo‘ldosh” mavzesini renovatsiya qilish dasturi
Ushbu muammoning yechimi sifatida mazkur hududni renovatsiya qilish dasturi ishlab chiqilgan bo‘lib, u quyidagi bosqichlardan iborat:
1) “Yo‘ldosh” mavzesi hududi ko‘p yillardan buyon ekologik tizimga salmoqli hissa qo‘shayotgan chinor (platan), lipa, eman va boshqa turdagi daraxtlardan iborat yashil o‘simliklar bilan qalin qoplanganligi sababli renovatsiyani boshqa joyda amalga oshirishga qaror qilindi. Ushbu yechim kislorod ishlab chiqarish va ekologik muvozanatni saqlashga yordam beradigan noyob tabiiy sharoitlarni saqlab qolish imkonini beradi. Massiv aholisini ko‘chirish uchun shu tumandagi yaqin hududlar ajratildi, bu ularga odatiy infratuzilma va mahalla bilan aloqani saqlab qolish imkonini beradi.
2) Ushbu masalani hal qilish uchun bir nechta joy o‘rganilib, “Gulshonobod” mahallasi hududining barcha mezonlarga javob beradigan va “Yo‘ldosh” mavzesi dan 1500 metrdan ortiq bo‘lmagan masofada joylashgan yer uchastkasi tanlandi.
3) Tashkent Invest AJ quruvchi kompaniya bilan birgalikda zamonaviy shaharda zamonaviy tuman loyihasi va konsepsiyasini ishlab chiqmoqda, unda zamon talablariga javob beradigan ijtimoiy, transport va kommunal infratuzilma nazarda tutiladi. Xonadonlarning dastlabki va oxirgi pardozlashiga alohida e’tibor qaratiladi.
4) Ushbu loyiha qurilish kompaniyasi bilan tuzilgan investitsiya shartnomasi asosida amalga oshiriladi, unda kvartiralarni davlat uy-joy fondiga berish shartlari aks ettirilgan.
5) 2018-yil 12-apreldagi O‘RQ-474-son qonuni va 2019-yil 7-noyabrdagi O‘RQ-581-son qonuniga muvofiq “Yo‘ldosh” mavzesi aholisini ko‘chirish amalga oshirilganda, shuningdek, jamoatchilik muhokamasi natijalariga ko‘ra, aholiga zamonaviy talablarga javob beradigan teng qiymatli kvartiralar (masalan, eski uydagi 1 xonali uy o‘rniga yangi uydagi 1 xonali uy) beriladi.
Muhtoj aholiga yangi uyga ko‘chib o‘tishda yordam ko‘rsatiladi.
Bundan tashqari, aholi o‘z uy-joyini kengaytirish, qo‘shimcha haq evaziga qo‘shimcha xonalar sotib olishda imtiyozli huquqqa ega bo‘ladi.
6) “Yo‘ldosh” mavzesi hududida mavjud daraxtlarni saqlab qolish va davolash hamda yangi daraxt va butalarni o‘tqazish orqali zamonaviy dendropark tashkil etish rejalashtirilgan.
Toshkentning Yangihayot tumanida joylashgan 400 dan ziyod ikki qavatli yog‘och uylar buzilib ularda yashovchi 4 mingdan ziyod xonadon tuman markazida quriladigan yangi uylarga ko‘chirilishi haqida 2021-yilning fevralida tuman hokimi Hayot Inog‘omov aytgandi.
Prezident Shavkat Mirziyoyev 2022-yilning fevralida Sergeli va Yangihayot tumani faollari bilan yig‘ilishda eski yog‘och uylarning buzilishiga to‘xtalib o‘tgandi.
“Yo‘ldosh” (“Sputnik”) mavzesidagi eskirgan 2 qavatli 409 ta yog‘och uy buzilib, ularning egalarini zamonaviy ko‘p qavatli turar joylarga ko‘chirish dasturi boshlanadi. Bunda ular uchun kelgusi besh yilda “Yangi Darxon” mahallasidagi 14 gektar hududda yangi ko‘p kvartirali uylar quriladi” degan edi prezident.
Shavkat Mirziyoyev bu uydan ko‘chishni istamaganlar ko‘chirilmasligini ta’kidlagandi.
“Agar birorta odam bu ota-bobomdan qolgan uyim, bu uy muzey men uchun, ko‘chmayman desa ko‘chirmaymiz. Lekin bu uylar avariyaviy holatda. O‘rniga yangi va sifatli uy qurilsa, to‘g‘ri tushuntirilsa odamlar o‘zi istaydi ko‘chishni. Mahalla raislari ham insonlarga buni to‘g‘ri tushuntirishi kerak”, degan edi davlat rahbari.
2024-yilning fevralida Toshkent shahar hokimi Shavkat Umurzoqov poytaxtda 500 gektardan ortiq hudud renovatsiyaga tushganini aytgandi.
“Ko‘p yillar ilgari ikki qavatli binolar, Sergeli tumanida vaqtinchalik uylar qurilgan. Ular talabga javob bermaydi va xavfsizlik nuqtayi nazaridan risklari katta”, degan edi hokim “O‘zbekiston 24” telekanaliga bergan intervyusida.
Davlat biznesga sharoit yaratib bergani uchun xususiy sektor ularni kelgusida bemalol ko‘chirishini, u yerlarga chiroyli qurilish obyektlarini barpo etilishini bildirgandi.
Tashkent Invest kompaniyasi matbuot xizmatining bildirishicha, shaharsozlik normalarini bajarish uchun 2025-yilning 1-choragida ochiq jamoatchilik muhokamasini o‘tkazish rejalashtirilgan.
Izoh (0)