O‘zbekiston, Ozarbayjon va Qozog‘iston rahbarlari “yashil” energiyani rivojolantirish va uzatish loyihasiga start berdi, deb xabar bermoqda Prezident matbuot xizmati.
Ma’lum qilinishicha, 13-noyabr kuni COP29 sammiti doirasida O‘zbekiston, Qozog‘iston va Ozarbayjon o‘rtasida “yashil” energiyani rivojlantirish va uzatish sohasida strategik sheriklik to‘g‘risidagi bitimni imzolash marosimi bo‘lib o‘tdi.
Tadbirda so‘zga chiqqan Shavkat Mirziyoyev qayta tiklanuvchi energiya iqtisodiy maqsad emas, balki kelajakka qo‘shilayotgan hissa, kelgusi avlodlar oldidagi masʼuliyat tuyg‘usining natijasi ekanligini taʼkidladi.
Loyihaning ekologik ahamiyati alohida qayd etildi. Uzatiladigan energiya — bu shamol va quyosh energiyasi bo‘lib, qayta tiklanadigan va toza manba hisoblanadi hamda iqlimga taʼsirni yumshatish imkonini beradi. Shu orqali tomonlar Parij bitimi va Barqaror rivojlanish maqsadlari doirasida iqlimni muhofaza qilish bo‘yicha qo‘shma saʼy-harakatlarni qo‘llab-quvvatlamoqda.
-ICXdl1H1.jpg)
Mamlakatlar qayta tiklanuvchi energiyaning katta zaxiralariga ega bo‘lib, global energetik o‘zgarishlarga salmoqli hissa qo‘shishi mumkinligi taʼkidlandi. Shu munosabat bilan Shavkat Mirziyoyev bu yo‘nalishda amalga oshirilayotgan ishlarning muhim jihatlariga alohida to‘xtalib o‘tdi.
“Yashil” energetikani jadal rivojlantirish bo‘yicha katta dastur qabul qilingan. O‘zbekistonda har yili 2 gigavattga yaqin quyosh va shamol elektr stansiyalari ishga tushirilmoqda. Bundan tashqari, 2024-yil oxirigacha tarmoqqa qo‘shimcha 2,6 gigavatt qayta tiklanuvchi energiya ishlab chiqarish quvvatlari va 300 megavattli energiya saqlash tizimlari ulanadi.
2030-yilga kelib qayta tiklanuvchi energiya manbalari ulushini 40 foizga yetkazish, shuningdek, 4,2 gigavattlik energiya saqlash tizimlarini yaratish rejalashtirilgan. Ishga tushirilayotgan loyihaning iqtisodiy samarasini barcha ishtirokchilar his etishiga ishonch bildirildi.
“O‘n minglab yangi ish o‘rinlari yaratiladi, energetika infratuzilmasi rivojlanadi, texnologik va ishbilarmonlik aloqalari kengayadi. Eng muhimi, aholi turmush darajasi oshadi”, deyiladi xabarda.
Qayd etilishicha, loyihani amalga oshirishni jadallashtirish, jumladan, qo‘shma korxona tashkil etish, texnik hujjatlarni ishlab chiqish va kelishish va boshqa tartib-taomillarni amalga oshirish muhimligi qayd etildi. Yakunda davlati rahbari O‘zbekistonning ushbu mintaqaviy loyihani birgalikda amalga oshirishga intilishi qatʼiy ekanini tasdiqladi.
2023-yilning noyabrida Bokuda elektr energiyasini ishlab chiqarish va eksport qilish masalalari bo‘yicha O‘zbekiston, Ozarbayjon va Qozog‘iston vazirlari uch tomonlama uchrashuvi bo‘lib o‘tgandi. Unda tomonlar Ozarbayjon orqali Markaziy Osiyo davlatlaridan Yevropaga elektr energiyasini eksport qilish imkoniyatlarini ko‘rib chiqqan. O‘zbekiston, Ozarbayjon, Qozog‘iston Yevropaga “yashil” energiya eksport qilish bo‘yicha texnik shartlarni tayyorlashga, shuningdek, loyihani amalga oshirish uchun qo‘shma korxona yaratish istiqbollarini o‘rganishga kelishilgandi.
Energetika vazirligi rahbari Jo‘rabek Mirzamahmudov Kaspiy dengizi tubi bo‘ylab elektr kabelini o‘tkazish bo‘yicha Qozog‘iston—O‘zbekiston—Ozarbayjon qo‘shma uch tomonlama loyihasi muvaffaqiyatli amalga oshirilsa, O‘zbekiston 2030-yildan boshlab ortiqcha elektr energiyasini Yevropaga eksport qila olishini aytgandi.
Izoh (0)